\Bम. टा. प्रतिनिधी, औरंगाबाद
\B'एमआयएममध्ये नगरसेवक म्हणून कार्यरत आहात. यंदाच्या विधानसभा निवडणुकीत पक्षाविरोधात कोणी गद्दारी केली तर, आगामी महापालिकेच्या निवडणुकीत या गद्दारांना धडा शिकवेन,' असा इशारा पक्षप्रमुख खासदार असदुद्दीन ओवेसी यांनी शनिवारी कटकट गेट येथील सभेत दिला.
सभेमध्ये खासदार इम्तियाज जलील, पक्षाचे उपाध्यक्ष तथा तेलंगणा येथील पक्षाचे आमदार अहेमद पाशा कादरी, औरंगाबाद पूर्वचे उमेदवार डॉ. गफ्फार कादरी, औरंगाबाद मध्यचे उमेदवार नासेर सिद्दीकी, औरंगाबाद पश्चिमचे उमेदवार अरूण बोर्डे यांच्यासह पक्षाचे पदाधिकारी आणि कार्यकर्ते उपस्थिती होते. जलील यांनी आपल्या भाषणात राष्ट्रवादी पक्षावर निशाणा साधला. 'तिहेरी तलाकच्या वेळी राष्ट्रवादीने साथ दिली असती तर, मुसलमान त्यांच्यासोबत राहिला असता' असे सांगितले. ओवेसी म्हणाले, 'गेल्या दोन दिवसांपासून औरंगाबादमध्ये प्रचार करत आहे. प्रचारात सर्वसामान्य मतदारांकडून चांगला प्रतिसाद मिळत आहे. निश्चित या निवडणुकीत यश मिळाल्याशिवाय राहणार नाही. निवडणुकीत पक्षातील काही नगरसेवक गद्दारी करत आहेत. त्यांनी गद्दारी थांबविली नाही तर, आगामी महापालिका निवडणुकीत अशा नगरसेवकांच्या विरोधात मी स्वत: त्यांच्या वॉर्डात ठाण मांडून बसेन,' असा इशारा त्यांनी दिला.
\B'एनआरसी'बाबत पक्ष करणार मदत
\B'देशभरात 'एनआरसी' करण्याचा निर्णय केंद्र शासनाकडून घेण्यात आला आहे. या कामासाठी पक्षाच्या वतीने विशेष टीम तयार केली जाणार आहे. यात शिक्षित युवक, त्यासाठी लागणारे कागदपत्रे याबाबतची माहिती दिली जाणार आहे. आसाममध्ये ज्या लोकांनी काम केले आहे, त्यांना बोलावून या प्रक्रियेची माहिती करून दिली जाणार आहे,' अशी घोषणा ओवेसी यांनी केली.
\Bतो व्हिडिओ फेक \B
एक सभा संपल्यानंतर पंतग खेचण्याचा इशारा करून ओवेसी डॉन्स करतानाचा व्हिडिओ प्रसारित करण्यात येत आहे. या बाबत ओवेसी म्हणाले, 'हा व्हिडीओ फेक आहे. सभा संपल्यानंतर कोणतेही संगीत किंवा माइक सिस्टीम आयोगाच्या आदेशाने लावण्यात येत नाही. काहींनी हा व्हिडीओ घेतला. त्या व्हिडिओला ब्रॅकग्राउंड म्युझिक दिले. अन् व्हिडिओ ओवेसी डॉन्सचा आहे, असा व्हायरल केला. डॉन्स आणि माझा कोणताही संबंध नाही. तो व्हिडीओ फेक आहे.'