म. टा. प्रतिनिधी, औरंगाबाद
खुलताबाद तालुक्यातील दरेगाव परिसरातील स्वत:च्या शेतामध्ये मक्याच्या पिकात ३९ हजार ४४० रुपये मूल्य असलेल्या गांजाच्या २६ झाडांची लागवड करणारा अशोक शंकर गायकवाड याला दहा वर्षे सक्तमजुरी व पाच हजार रुपये दंडाची शिक्षा जिल्हा व सत्र न्यायाधीश एस. जी. गिरधारी यांनी गुरुवारी (२९ ऑगस्ट) ठोठावली.
या प्रकरणी खुलताबाद पोलिस ठाण्यातील पोलिस उपनिरीक्षक सलीम बशीर पठाण यांनी फिर्याद दिली होती. त्यानुसार, १४ मे २०११ रोजी दरेगाव परिसरातील गट क्रमांक २११ मधील शेतामध्ये मक्याच्या पिकात गांजाची लागवड केल्याची गुप्त माहिती फिर्यादीला मिळाली होती. त्यानुसार फिर्यादी, पंच व इतर पोलिसांनी सापळा रचून घटनास्थळी छापा मारला असता, अशोक शंकर गायकवाड (वय ४०, रा. दरेगाव, ता. खुलताबाद) यांच्या शेतामध्ये चार ते नऊ फूट उंचीची गांजाची २६ झाडे आढळून आली होती, ज्याचे मूल्य ३९ हजार ४४० रुपये होते. ही झाडे जप्त करून तपासणीसाठी नमुना पाठवण्यात आला होता व 'सीए रिपोर्ट'मध्ये ती झाडे गांजाचीच असल्याचे स्पष्ट झाले होते. प्रकरणात खुलताबाद पोलिस ठाण्यात गुन्हा दाखल करण्यात आला होता.
\B... तर आणखी सहा महिने शिक्षा
\Bखटल्यावेळी, सहाय्यक सरकारी वकील अरविंद बागूल यांनी पाच साक्षीदारांचे जबाब नोंदवले. यामध्ये फिर्यादी व पंचाचा जबाब तसेच 'सीए रिपोर्ट' महत्त्वाचा ठरला. दोन्ही बाजुंच्या युक्तिवादानंतर व साक्ष-पुराव्यांवरून न्यायालयाने अशोक शंकर गायकवाड याला दोषी ठरवून एनडीपीएस कायद्याच्या कलम २० अन्वये दहा वर्षे सक्तमजुरी व पाच हजार रुपये दंड व दंड न भरल्यास सहा महिने अतिरिक्त सक्तमजुरीची शिक्षा ठोठावली.