एकनाथ खडसे यांना हायकोर्टाची नोटीस

औरंगाबाद : माजी मंत्री एकनाथ खडसे यांच्या तक्रारीवरुन दाखल प्रथम माहिती अहवाल रद्द करण्यााची विनंती सामाजिक कार्यकर्त्या अंजली दमानिया यांनी केली आहे. त्यावरून खडसे यांना नोटीस बजावण्याचा आदेश औरंगाबाद खंडपीठाचे न्या. टी.व्ही. नलावडे आणि न्या. के.एल. वडणे यांनी दिले आहे.

अंजली दमानिया व इतरांनी संगनमत करून, धनादेश चोरून त्यावर खोटा मजकूर लिहून बनावट दस्त तयार केले आणि ते खरे असल्याचे भासवून त्याचा उपयोग केला, अशा आशयाची तक्रार माजी मंत्री खडसे यांनी १३ जून २०१८ रोजी जळगाव जिल्ह्यातील मुक्ताईनगर पोलिस ठाण्यात दिली होती. या तक्रारीवरुन दाखल पहिली खबर (एफआयआर)क्रमांक ११६/२०१८ )रद्द करण्याचे आदेश द्यावेत, अशी विनंती अंजली दमानिया यांनी फौजदारी अर्जामध्ये केली आहे . या प्रकरणात दमानिया व इतर यांच्यावतीने विजय बी. पाटील तर शासनातर्फे सहायक सरकारी वकील महेंद्र. एम. नेरलीकर यांनी काम पाहिले. या अर्जावर २१ ऑगस्ट रोजी सुनावणी होणार आहे.