डिझेल दरवाढीमुळे मालवाहतूकदार हैराण

म. टा. प्रतिनिधी, औरंगाबाद

शहरात मागील चौदा वर्षांतील सर्वाधिक दराने पेट्रोल आणि डिझेल विकले जात आहे. डिझेलच्या दरवाढीमुळे मालवाहतूकदार हैराण झाले असून ते 'चक्का जाम' आंदोलन करण्याच्या तयारीत आहेत.

कर्नाटकची निवडणूक संपातच पेट्रोल आणि डिझेलचे दर वेगाने वाढत आहेत. शहरात सध्या पेट्रोल ८४ रुपये, तर डिझेल ७२ रुपये ५३ पैसे प्रतिलिटर प्रमाणे विकले जात आहे. यामुळे मालवाहतूकदारांचे हाल होत आहेत. मात्र, कंपन्यांसोबतच्या करारामुळे डिझेलचे दर वाढले तरी दरवाढ करता येत नाही. यामुळे वाहनांचे सुटे भाग, देखभाल दुरुस्ती, चालकांच्या वेतनावर होणाऱ्या खर्चासह डिझेलवरील खर्च वाढला आहे.

शहरात दररोज अडीच हजारांपेक्षा जास्त ट्रक येतात व तीन लाख लिटर डिझेलची विक्री होते. काही दिवसांत डिझेल दोन ते अडीच रुपयांनी वाढल्याने व्यावसायिकांवरील ताण वाढल्याने ते आंदोलनाच्या तयारीत आहे.

'डिझेल दरवाढीमुळे मालवाहतूक व्यवसायावर परिणाम झाला आहे. येत्या काही दिवसांत असोसिएशनच्या पदाधिकाऱ्यांसोबत चर्चा करून आंदोलनाची दिशा ठरवण्यात येणार आहे,' अशी माहिती औरंगाबाद ट्रान्सपोर्ट असोसिएशनचे अध्यक्ष फैय्याज खान यांनी सांगितले.