पत्नीच्या विरहाने पतीची आत्महत्या

म. टा. प्रतिनिधी, औरंगाबाद
पत्नी माहेरी राहत असल्याने तिच्या विरहात पतीने गळफास घेऊन आत्महत्या केली. ही घटना शनिवारी सायंकाळी उस्मानपुरा, फुलेनगर भागात उघडकीस आली. आशिष दिलीप निकम (वय २४), मृताचे नाव असून उस्मानपुरा पोलिस ठाण्यात अकस्मात मृत्युची नोंद करण्यात आली आहे.
आशीष हा फुलेनगर भागात आई व वडिलांसह राहत होता. त्याची आई शनिवारी सायंकाळी घराबाहेर भांडे घासत होती, तर वडील कामानिमित्त बाहेर गेले होते. यावेळी आशिषचे मेहुणे उमेश साळवे हे घरी आले. त्यांनी आशिषला आवाज दिला असता त्याच्या खोलीतून प्रतिसाद मिळाला नाही. त्यांनी खोलीत जाऊन पाहिले असता आशिषने छताच्या हुकाला साडीने गळफास घेऊन आत्महत्या केल्याचे दिसून आले. आशिषला हॉस्पिटलमध्ये हलवण्यात आले. यावेळी डॉक्टरांनी त्याला तपासून मृत घोषित केले. आशिष आणि त्याच्या पत्नीमध्ये वाद असल्याने दोन वर्षांपासून त्याची पत्नी माहेरी राहत होती. यामुळे तो तणावात होता, अशी माहिती त्याच्या नातेवाईकांनी दिली.