म. टा. प्रतिनिधी, औरंगाबाद
शहरातील बड्या बांधकाम व्यावसायिकासह एक उद्योग समूह, तसेच ऑइल मिल मालकाच्या कार्यालयावर मंगळवारी प्राप्तिकर विभागाने छापे टाकले. सकाळी आठपासून सुरू असलेली कारवाई रात्री उशीरापर्यंत सुरू होती.
शहर परिसरात एका धाब्याचालकावर आठ महिन्यांपूर्वी झालेल्या कारवाईनंतर प्राप्तिकर विभागाने पुन्हा जोमाने कारवाईसत्र हाती घेतले आहे. अदालत रोडवर असलेल्या एका बांधकाम व्यवसायिकाच्या कार्यालयावर प्राप्तिकर विभागाच्या अन्वेषण विंगच्या पथकाने सकाळी आठ वाजता छापा टाकला. कार्यालयाचा दरवाजा आतून बंद करत अधिकाऱ्यांची तेथील कागदपत्राची तपासणी सुरू केली. पथकातील अधिकारी, कर्मचारी यांच्याशिवाय इतर कोणालाही संबंधित कार्यालयात प्रवेश दिला जात नव्हता. रात्री उशीरापर्यंत पथकाची तपासणी सुरू होती. शहरातील एका बड्या उद्योग समहूाचे याच परिसरात कार्यालय आहे. त्या कार्यालयावरही पथकाने धाड टाकत कागदपत्राची तपासणी केली. यासह अन्य एका बांधकाम व्यावसायिकावर तसेच एका आइल कंपनीच्या मालकावर कारवाई झाल्याचे समजते.
\Bअधिकाऱ्यांचा बोलण्यास नकार
\Bअहमदनगरहून एक पथक सकाळी सहा वाजता निघाले. औरंगाबाद येईपर्यंत नेमके कुठे जायचे आहे, हे कर्मचाऱ्यासह चालकासही माहिती नव्हते. स्थानिक अधिकाऱ्यांनाही याबाबत कल्पना नसल्याचे समोर आले असून, येथील २५हून अधिक अधिकारी, कर्मचाऱ्यांचा या पथकात समावेश असल्याचे समजते. मात्र, कारवाईबाबत शेवटाच्या क्षणापर्यंत वरिष्ठांनी खात्याअंतर्गतही कमालीची गुप्तता पाळली. याबाबत प्राप्तिकर विभागाच्या औरंगाबाद तसेच पुणे येथील अधिकाऱ्यांशी संपर्क साधला असता, त्यांनी याबाबत बोलण्यास नकार दिला आहे. त्यामुळे कारवाई कोण कोणत्या बांधकाम व्यावसायिक, उद्योग समूहावर झाली, तपासादरम्यान काय महत्त्वाचे दस्तावेज हाती लागले, याचा अधिकृत तपशील समजू शकला नाही.