म. टा. प्रतिनिधी ,औरंगाबाद
औरंगाबाद शहर परिमंडळ दोनचे पोलिस उपायुक्त राहुल श्रीरामे यांनी अटकपूर्व जामीनासाठी जिल्हा न्यायालयात धाव घेतली आहे. जिल्हा व सत्र न्यायाधीश एच. के. भालेराव यांच्यासमोर त्यांच्या अर्जावर सुनावणी होईल. यापूर्वी ५ जुलै रोजी बलात्काराचा गुन्हा रद्द करण्यासाठी हायकोर्टात दाखल याचिका त्यांना मागे घ्यावी लागली आहे.
महिला पोलिसाच्या बावीस वर्षांच्या मुलीने, नोकरीचे आमिष दाखवून बलात्कार केल्याचा आरोप तक्रारीत केला आहे. हा प्रकार फेब्रवारी ते जून महिन्याच्या दरम्यान घडला. पीडित तरुणीने पोलिस आयुक्तालयाच्या व्हॉटस्अॅप ग्रुपवर तक्रार केल्यानंतर २७ जून रोजी एमआयडीसी सिडको पोलीस ठाण्यात श्रीरामे यांच्याविरुद्ध गुन्हा दाखल करण्यात आला. पोलिसांनी पीडितेचा शोध घेण्यासाठी खबऱ्यांची मदत घेतली आहे. या प्रकरणाची गंभीरता वाढत असताना पीडित ही केवळ सोशल मीडियाचा वापर करून यु-ट्युबवर तिची कथा मांडत आहे. पण तिने अद्यापही जबाब नोंदविला नाही. या प्रकरणात तिच्या वैद्यकीय तपासणीचा पुरावा महत्वाचा असूनही ती पोलिसांसमोर का येत नाही, हा गुंतागुंतीचा प्रश्न निर्माण झाला आहे.