म. टा. प्रतिनिधी, औरंगाबाद
शासकीय वैद्यकीय महाविद्यालय व रुग्णालयात (घाटी) शुक्रवारपासून तीन दिवसांची १२व्या इरकॉन परिषद सुरू होत आहे. घाटीसह विविध महाविद्यालयांतील विद्यार्थी शुक्रवारी (दहा जानेवारी) सकाळी नऊ ते एक या वेळेत १९० संशोधन पत्रिका व पोस्टरचे सादरीकरण करतील.
दुपारी तीन ते पाचदरम्यान बेसिक लाइफ सपोर्टसंदर्भातील कार्यशाळा होईल. यात डॉ. राजश्री सोनवणे, डॉ. अमोल जोशी, डॉ. अतुल लोंढे, डॉ. अमोल सूर्यवंशी आदी मार्गदर्शन करतील. त्याचवेळी दुपारी तीन ते पाच यादरम्यान नवजात शिशू व अर्भकातील व्यंग आणि तपासण्यांसंदर्भात अॅनॉटॉमी लेक्चर हॉल येथे चर्चासत्र होईल. यात डॉ. श्रीनिवास गडप्पा, डॉ. सोनाली देशपांडे, डॉ. प्रशांत भिंगारे यांच्या उपस्थितीत डॉ. शिल्पा सातारकर, डॉ. बिमल सहानी मार्गदर्शन करणार आहेत. याच वेळेत मायक्रोबायलॉजी लेक्चर हॉल येथे जॉइंट व नसांची सोनोग्राफी यासंदर्भात ज्येष्ठ अस्थिरोगतज्ज्ञ डॉ. जगन्नाथ कागिनाळकर व डॉ. मोहीत शहा मार्गदर्शन करतील. या वेळी अस्थिरोग संघटनेचे डॉ. एम. बी. लिंगायत, डॉ. यशवंत गाडे, डॉ. मंगेश पानट, डॉ. सारंग देवरे यांची उपस्थिती असेल, असे आयोजकांनी कळविले आहे.