भावास गतिमंद भावाची किडनी; याचिका फेटाळली

दोन्ही किडन्या निकामी झालेल्या डॉक्टर भावाला गतिमंद भावाची किडनी देण्याची परवानगी मागणारी याचिका मुंबई उच्च न्यायालयाच्या औरंगाबाद खंडपीठाचे न्या. रवींद्र बोर्डे आणि न्या. विभा कंकणवाडी यांनी गुरुवारी फेटाळली.
नांदेड जिल्ह्यातील हदगाव येथील डॉक्टरच्या दोन्ही किडन्या निकामी झालेल्या आहेत. त्यांच्या एका भावाच्या किडन्या डॉक्टरशी जुळतात. म्हणून पवार कुटुंब औरंगाबादला बजाज रुग्णालयात आले आहेत. त्यांच्या वडिलांचे वय ७० वर्षे आहे. त्यामुळे ते किडनी देऊ शकत नाहीत. एक शिक्षक असलेल्या भावाचा रक्तगट जुळत नाही, बहिणीला लहानपणीच आईने किडनी दिलेली आहे. तिच्याही किडन्या निकामी झाल्या आहेत. अशा परिस्थितीत त्यांचा एक भाऊ जो गतिमंद आहे, त्याचा रक्तगट आणि किडनी डॉ. पवार यांच्याशी जुळतात. त्यांच्यावर कमलनयन बजाज रुग्णालयात उपचार सुरू आहेत. तेथील कमिटी फॉर आॅर्गन ट्रान्सप्लांटने, ‘ह्यूमन आॅर्गन अँड टिशू ट्रान्सप्लांट अ‍ॅक्ट १९९४ च्या कलम ९ (१)’ अन्वये दाता गतिमंद असल्याने त्याच्या अवयवांचे दान करता येत नाही, असा निवडा दिला.
त्यामुळे डॉक्टरांच्या वडिलांनी औरंगाबाद खंडपीठात धाव घेतली होती. किडनीदाता गतिमंद भाऊ स्वत: निर्णय घेण्यास सक्षम आहे का, याच्या परिणामांची त्याला जाणीव आहे का, या बाबींची मानसोपचारतज्ज्ञ डॉ. विनय बाऱ्हाळे यांच्याकरवी तपासणी करण्याचे आणि त्यांचे त्याबाबतचे मत १४ डिसेंबरपर्यंत खंडपीठात दाखल करण्याचे निर्देश खंडपीठाने दिले होते. त्यानुसार ते खंडपीठात सादर करण्यात आले होते. किडनीदाता निर्णय घेण्यास सक्षम नसल्याचे मत तज्ज्ञ डॉक्टरांचे असल्याचे प्रभाकर के. जोशी यांनी सांगितले. त्याला न्यायमुर्तींच्या दालनात हजर केले असता त्याच्याशी संवाद साधल्यानंतर तो सक्षम नसल्याचे खंडपीठाच्या निदर्शनास आले होते. निकालासाठी राखून ठेवलेली ही याचिका शुक्रवारी फेटाळण्यात आली. याचिकाकर्त्यातर्फे प्रभाकर के. जोशी, अरविंद आर. जोशी आणि व्ही. पी. गोलेवार, कमलनयन बजाज रुग्णालयातर्फे लहरीमनोहर डी. वकील, तर शासनातर्फे सरकारी वकील स्वप्नील जोशी यांनी काम पाहिले.