…म. टा. प्रतिनिधी, औरंगाबाद
चोरट्यांनी दोन विविध घटनांत सोन्याच्या गंठणासह रोख ४८ हजारांची रक्कम लंपास केली. हे प्रकार सोमवारी रात्री गजानननगर भागात तर, मंगळवारी दुपारी टीव्ही सेंटर भागात घडले. याप्रकरणी पुंडलिकनगर आणि सिडको पोलिस ठाण्यात अज्ञात आरोपीविरुद्ध चोरीचे गुन्हे दाखल करण्यात आले आहेत.
चोरीची पहिली घटना सोमवारी मध्यरात्री गजानननगर, शिवनेरी चौक गल्ली क्रमांक नऊ येथे घडली. येथील रामराव अप्पाराव तरटे (वय ६५) हे उकाडा असल्याने कुटुंबियांसह घराबाहेर झोपले होते. दरवाजा उघडा असल्याची संधी साधत चोरटे घरात शिरले. लाकडी कपाटात ठेवलेले साडेसहा तोळ्याचे सोन्याचे गंठण (किंमत एक लाख ३० हजार रुपये) त्यांनी चोरून नेले. हा प्रकार मंगळवारी सकाळी लक्षात आला. याप्रकरणी तरटे यांच्या तक्रारीवरून पुंडलिकनगर पोलिस ठाण्यात अज्ञात आरोपीविरुद्ध चोरीचा गुन्हा दाखल करण्यात आला आहे.
चोरीचा दुसरा प्रकार मंगळवारी टीव्ही सेंटर भागातील जियो स्टोअरसमोर घडला. ऋषिकेश लक्ष्मीकांत व्यवहारे (वय १९, रा. मयूरपार्क) हा तरुण छोटा हत्ती वाहनामध्ये मित्रासोबत टीव्ही सेंटर भागात गेला होता. जियो स्टोअर्समध्ये ते दोघे कार्ड रिचार्ज करण्यासाठी गेले. यावेळी त्यांनी वाहनाच्या चालकाच्या सिटच्या मागे रोख ४८ हजार रुपये आणि स्वॅप मशीन ठेवलेले होते. चोरट्यानी वाहनाचा दरवाजा उघडा असल्याची संधी साधत ही रोख रक्कम आणि मशीन लंपास केले. याप्रकरणी व्यवहारेच्या तक्रारीवरून सिडको पोलिस ठाण्यात अज्ञात आरोपीविरुद्ध गुन्हा दाखल करण्यात आला आहे.