नाना पटोलेंविरोधात भाजपचं जोरदार आंदोलन, 'रास्ता रोको'चा प्रयत्न, आंदोलक- पोलिसांत झटापट

औरंगाबाद : पंतप्रधान नरेंद्र मोदींबद्दल काँग्रेसचे प्रदेशाध्यक्ष नाना पटोले यांनी केलेल्या वक्तव्याच्या विरोधात भाजपकडून औरंगाबाद मध्ये रास्ता रोको करण्याचा प्रयत्न करण्यात आला. यावेळी काही काळासाठी गोंधळ उडाला होता, तर पोलिस आणि आंदोलक यांच्यात झटापट सुद्धा पाहायला मिळाली.

गेल्या काही दिवसांपासून पटोले यांनी मोदींविरोधात आक्षेपार्ह विधानाची मालिकाच लावली आहे. त्यांच्या याच विधानाला विरोध करत औरंगाबादमध्ये आज (मंगळवारी) भाजपच्या वतीने शहरातील सिडको बसस्थानक चौकात जोडे मारो आंदोलन करण्यात आले.या वेळी आक्रमक झालेल्या आंदोलकांनी रस्ता रोको करण्याचा प्रयत्न केला.दरम्यान आंदोलक आणि पोलिसात झटापट झाली.

तसेच भाजप पदाधिकाऱ्यांनी नाना पाटोले यांचा पुतळा जाळण्याचा प्रयत्न केला. मात्र पोलिसांनी भाजप पदाधिकाऱ्यांना ताब्यात घेतले. या आंदोलनामुळे बराचवेळ गोंधळाची परिस्थिती पाहायला मिळाली. तर नाना पटोले यांनी औरंगाबादेत पाय ठेऊन दाखवावे, त्यांचे कपडे फाडु असा इशारा शहर अध्यक्ष संजय केनेकर यांनी यावेळी दिला.

कोरोनाचे नियम पायदळी..…

यावेळी भाजपकडून करण्यात आलेल्या आंदोलनात मोठ्याप्रमाणात गर्दी पाहायला मिळाली. तसेच अनेक भाजप पदाधिकारी आणि कार्यकर्त्यांनी मास्क सुद्धा घातले नव्हते. त्यामुळे भाजपकडूनच पंतप्रधान नरेंद्र मोदींच्या आवाहनाला केरीची टोपली दाखवण्यात आल्याचं पाहायला मिळाले.