बाळासाहेब ठाकरे समृध्दी महामार्गाच्या ठेकेदाराला भाजपचं अल्टीमेटम; अन्यथा तीन दिवसांनंतर....

मुंबई : समृद्धी महामार्ग लवकरच वाहतुकीसाठी खुला होणार असून, औरंगाबादच्या वैजापूर तालुक्यात समृध्दी महामार्गाचे काम युद्ध पातळीवर सुरु आहे. मात्र समृद्धीच्या कामामुळे धावणाऱ्या अवजड वाहनांमुळे जुन्या रस्त्यांची दुरवस्था झाली असून, त्वरित रस्त्यांचं काम करावं अन्यथा तीव्र असे आंदोलन करण्यात येईल असा इशारा भाजपकडून देण्यात आला आहे.

भाजपकडून वैजापूर उपविभागीय अधिकारी यांना देण्यात आलेल्या निवेदनात म्हटलं आहे की, नागपूर-मुंबई समृद्धी महामार्गाचे काम चालू असून, वैजापूर तालुक्याच्या हद्दीतून या रस्त्याच्या कामासाठी लागणाऱ्या साहित्याची मोठ्या प्रमाणात वाहतूक सुरू आहे. तर या बांधकाम साहित्याची वाहतूक नियमबाह्य पद्धतीने चालू असून क्षमतेपेक्षा जास्त वजनाची अवजड वाहतूक होत असल्यामुळे परिसरातील रस्ते खराब झालेले आहेत. या रस्त्यांवर मोठमोठे खड्डे पडलेले असून, लोकांना जीव मुठीत धरून प्रवास करावा लागत असल्याचा आरोप करण्यात आला आहे.

त्यामुळे या सर्व रस्त्यांची २६ जानेवारी २०२२ पर्यंत तात्काळ दुरूस्ती करावी, अन्यथा भारतीय जनता पार्टीतर्फे माजी नगराध्यक्ष दिनेश परदेशी यांच्या मार्गदर्शनाखाली तीव्र आंदोलन करण्यात येईल असा इशारा भाजपकडून देण्यात आला आहे. त्यामुळे आगामी काळात या मुद्यावरून भाजपकडून आक्रमक भूमिका घेतली जाणार असून, यावरून राजकीय वातावरण सुद्धा तापण्याची शक्यता आहे.

अन्यथा तीन दिवसांनंतर....

समृद्धी महामार्गाच्या कामासाठी अवजड वाहनांच्या वाहतुकीमुळे वैजापूर तालुक्यातील वैजापूर ते म्हस्की, लाडगाव रोडवरील वैजापूर ते खंबाळा फाटा ह्या रस्त्यांची अवस्था अत्यंत दयणीय झालेली आहे. तसेच अपघाताचे प्रमाण वाढलेले असून ल, आतापर्यंत अनेकांना अपंगत्व आलेले आहे तर, अनेकांना प्राण गमवावे लागले असल्याचा आरोपही निवेदनात करण्यात आला आहे.