कोरोनाचा धसका! 'या' शहरातील कोचिंग क्लासेस बंद करण्याचा निर्णय

औरंगाबाद : राज्यभरात कोरोना रुग्णांची वाढती संख्या पाहता राज्य सरकारकडून काही निर्बंध लावण्यात आले आहे. तर स्थानिक पातळीवर सुद्धा परिस्थिती पाहून वेगवेगळे निर्णय घेतले जात आहे. दरम्यान औरंगाबाद महानगरपालिकेने पहिली ते बारावी व इतर अभ्यासक्रमाचे खाजगी कोचिंग क्लासेस बंद करण्याचे आदेश काढले आहे. महापालिका आयुक्त आस्तिक कुमार पांडे यांनी हे आदेश दिले आहेत.

अस्तिक कुमार पांडे यांनी काढलेल्या आदेशात म्हटलं आहे की, औरंगाबाद महानगरपालिका क्षेत्रामध्ये कोव्हिड-19 बाधित रुग्णांची संख्या आणि ओमीक्रॉनवर पूर्णपणे नियंत्रणासाठी विद्यार्थ्यांचा होणारा जमाव कमी करणे आवश्यक आहे. त्यामुळे कोव्हिड-19 प्रतिबंधात्मक सर्वसाधारण उपाययोजना करत पहिली ते बारावी आणि इतर अभ्यासक्रमाचे खाजगी कोचिंग क्लासेस १० जानेवारी पासून १५ फेब्रुवारीपर्यंत करण्याचे आदेश देण्यात येत आहे.

मात्र कोचिंग क्लासेस बंद केल्यामुळे विद्यार्थ्यांचे शैक्षणिक नुकसान होऊ नये म्हणून, पूर्वीप्रमाणे ऑनलाईन व दुरस्थ शिक्षण पध्दतीने सुरु ठेऊ शकतात, असेही या आदेशात म्हटले आहे. तर कोरोनाची परिस्थिती लक्षात घेता वेळोवेळी परिस्थितीचा आढावा घेऊन पुढील निर्णय घेण्यात येईल, असेही पांडे यांनी आपल्या आदेशात म्हटले आहे.