क्षुल्लक कारणावरुन सुरु झालेला वाद एवढ्या विकोपाला गेला की, थेट कुऱ्हाडीने....

औरंगाबाद: शहरातील वाळूज भागात एक धक्कादायक घटना समोर आली असून, क्षुल्लक कारणावरून झालेल्या वादात थेट कुऱ्हाडीने हल्ला करण्यात आला. विक्री केलेल्या कापसाचे पैसे का मागितले असं म्हणत चार ते पाच जणांनी एकास शिवीगाळ करुन कुऱ्हाडीने मारहाण केली. ज्यामध्ये एक जण जखमी झाला असून, याप्रकरणी वाळूज एमआयडीसी पोलिस ठाण्यात गुन्हा दाखल करण्यात आला आहे.

अधिक माहिती अशी की, ही घटना कासोडा शिवारातील गट नंबर ३९ येथे घडली. पुंडलिक केशव हिवाळे (वय ६५, रा. कासोडा, वाकी वस्ती, ता. गंगापुर) असे मारहाणीत जखमी झालेल्या शेतकऱ्याचे नाव आहे. पुंडलिक हिवाळे हे २७ फेब्रुवारी रोजी कासोडा शिवारात मका वाळू घालत होते. यावेळी त्यांचा भाऊ काकासाहेब केशव हिवाळे, कृष्णा भाऊसाहेब हिवाळे आणि तीन महिला त्या ठिकाणी आल्या. त्यांनी कापसाचे पैसै का मागितले असं म्हणत पुंडलिक हिवाळे यांच्या सुनेसोबत वाद घातला. त्यानंतर तिला मारहाण करण्यास सुरुवात केली.

हा प्रकार लक्षात आल्यानंतर पुंडलिक हिवाळे हे मध्यस्थी करण्यासाठी घटनास्थळी गेले. यावेळी भाऊसाहेब हिवाळे याने सोबत आणलेल्या कुऱ्हाडीने पुंडलिक हिवाळे यांच्यावर वार करून त्यांना मारहाण केली. ज्यात पुंडलिक हिवाळे हे जखमी झाले आहे. तर या प्रकरणी काकासाहेब हिवाळे, भाऊसाहेब हिवाळे, कृष्णा हिवाळे यांच्यासह तीन महिलांविरूध्द एमआयडीसी वाळूज पोलिस ठाण्यात गुन्हा दाखल करण्यात आला आहे.