Aurangabad: मन सुन्न करणारी घटना, दोन आठवड्यात सासूसह सुनही विधवा

औरंगाबाद : आयुष्याच्या या खेळात नियतीचा पराभव करणं अवघड आहे. कधीकधी आयुष्यात दु:खाचा डोंगर असा कोसळतो की त्याला सहन करण्याची क्षमताच उरत नाही. असाच दुःखाचा डोंगर औरंगाबादच्या कचनेर तांडा नंबर ६ वरील जाधव कुटुंबीयांवर कोसळला आहे. वडिलांच्या अपघाती मृत्यूच्या दुःखातून सावरत नाही तोच पाठोपाठ मुलाचाही अपघातात मृत्यू झाल्याची मन सुन्न करणारी घटना घडली आहे.

सासू-सूनेवर दु:खाचा डोंगर

मिळालेल्या माहितीनुसार, कचनेर तांडा येथील अर्जुन रामदास जाधव (वय ५०) हे ४ डिसेंबर रोजी आपल्या सुनबाई काजल सुरेश जाधव यांच्या प्रसुतीच्या उपचाराच्या बिलाचे पैसे भरण्यासाठी मोटारसायकलने औरंगाबादला जात असताना समोरून येणाऱ्या आयशरने समोरासमोर जोराची धडक दिल्याने या घटनेत त्यांचा घटनास्थळीच मृत्यू झाला.

या जबर धक्यातून कुटुंबातील सदस्य आणि नातेवाईक एकमेकांना धीर देत स्वतःला सावरत असतांना पंधरा दिवसाच्या फरकाने अर्जुन जाधव यांचा मुलगा सुरेश जाधव (वय २४) याचाही १७ डिसेंबर रोजी अपघातात मृत्यू झाला. सासू ढवळाबाई पाठोपाठ सून काजलवर देखील विधवा होण्याची वेळ नशिबी आल्याचं पाहून गावात शोकसागरात बुडालं. सुरेश जाधव यांचा अपघातात मृत्यू झाल्याची बातमी आल्यानंतर त्या दिवशी गावातील एकही चूल पेटली नाही.

सासऱ्यासह बाप-लेकांसाठी शनिवार ठरला घातवार

अर्जुनराव जाधव यांचा अपघात ४ डिसेंबर रोजी झाला म्हणजेच शनिवारचा दिवस होता. तर मुलगा सुरेश जाधव यांचा अपघातात मृत्यू झाल्याची घटना १७ डिसेंबरला घडली, त्यादिवशी सुद्धा शनिवारच होता.दुर्दैव म्हणजे सुरेश जाधव यांचे सासरे रविंद्र गणेश चव्हाण यांचा सुद्धा दोन वर्षांपूर्वी अपघातात जीव गेला होता आणि तो दिवस सुद्धा शनिवारचाच होता. त्यामुळे सासऱ्यासह बाप-लेकांसाठी शनिवार घातवार ठरल्याची चर्चा गावात पाहायला मिळाली.