कलरच्या पाण्याची पिशवी फेकून का मारली? वाद सुरु झाला, थेट लोखंडी गजाने....

औरंगाबाद : तुमच्या मुलाने कलरच्या पाण्याची पिशवी फेकून का मारली म्हणुन सुरु झालेला किरकोळ वाद एवढ्या विकोपाला पोहचला की, थेट लोखंडी गजाने मारहाण केल्याची घटना शहरातील पदमपुरा परिसरात घडली आहे तर या मारहाणीत एक महिला जखमी झाली असून, त्यांच्यावर शासकीय घाटी रुग्णालयात उपचार करण्यात आले. याप्रकरणी वेदांतनगर पोलीस ठाण्यात गुन्हा दाखल करण्यात आला आहे.

महिलेने पोलिसात दिलेल्या तक्रारीनुसार, त्यांचा मुलगा क्रिकेट खेळून घरी येत असताना, होळीसाठी तयार केलेल्या कलरच्या पाण्याची पिशवी फेकून का मारली यावरुन किरकोळ वाद झाला. त्यानंतर संबंधित मुलाचा आत्तेभावाने महिलेच्या मुलास रंगीत पाण्याची पिशवी फेकून का मारली या कारणावरुन लाथा बुक्क्यांनी मारहाण करायला सुरवात केली. तर मुलाला मारहाण होत असल्याने महिला आणि तिच्या मुलीने धाव घेत वाद सोडवण्याचा प्रयत्न केला.

पण यावेळी मारहाण करणाऱ्या मुलाच्या आत्तेभावाने महिलेला शिवीगाळ केली आणि लोखंडी गजाने मारहाण केली. तर याच आत्तेभावाने महिलेच्या मुलीला सुद्धा लाथआ बुक्क्यांनी मारहाण केली. ज्यात महिला जखमी झाली. त्यामुळे त्यांनी वेदांतनगर पोलीस ठाणे गाठत हकीकत सांगितली. मात्र महिलेला मारहाण झाली असल्याने पोलिसांनी आधी वैद्यकीय उपचाराकामी मेडिकल मेमो देऊन घाटी हॉस्पिटल येथे पाठवले आणि त्यानंतर गुन्हा दाखल केला आहे.