मी राजकारणातील कुंभार, आतापर्यंत अनेक नेते तयार केले; दानवेंचा कार्यकर्त्यांना बूस्टर डोस

औरंगाबाद : मी राजकारणातील कुंभार आहे. हातातलं मडकं फुटलं की कुंभार रडत नाही. फेकून देतो आणि पुन्हा नवं तयार करतो. मी अनेक नेते तयार केले आहेत, अशी फटकेबाजी भाजप नेते आणि केंद्रीय रेल्वे राज्यमंत्री रावसाहेब दानवे यांनी केली. औरंगाबादच्या पिंप्रीराजा येथे आयोजित करण्यात आलेल्या युवा मोर्चा भाकरी घरच्या डब्बा पार्टी कार्यक्रमात ते बोलत होते.

गेल्या काही दिवसांपासून रावसाहेब दानवे पक्षातील तरुण कार्यकर्त्यांसोबत डब्बा पार्टी करत संवाद साधत आहेत. तसेच आगामी निवडणुकीच्या अनुषंगाने पक्षातील कार्यकर्त्यांना चार्ज करत, कामाला लागा असा मेसेज देत आहे. रविवारी दानवे यांनी औरंगाबादच्या पिंप्रीराजा येथे भाजप युवा मोर्चाच्यावतीने आयोजित युवा संवाद व डब्बा पार्टी कार्यक्रमात उपस्थित राहून,तुम्हाला निवडणुकीसाठी तयार करायला आलोय, असे म्हणत कामाला लागण्याचा सल्ला दिला आहे.

यावेळी बोलताना दानवे म्हणाले की, आजच्या परिस्थितीत भाजपा विरोधात सगळे उभे आहेत. हे वर्ष निवडणुकीचं आहे. नगरपंचायीतमध्ये भाजपची ताकद आपण दाखवून दिलीच आहे, असा टोला दानवेंनी विरोधकांना लगावला. तसेच कार्यकर्ता गाजरा सारखा नसावा जो उपटलं की एकटं निघतो, तो भुईमुगाच्या वेलासारखा पाहिजे, उपटला की गुच्छ निघतो, असा बूस्टर डोस दानवे यांनी कार्यकर्त्यांना दिला.

दानवेंचा 'डब्बा पार्टी पॅटर्न'

आगामी स्थानिक निवडणुका लक्षात घेता सर्वच पक्ष कामाला लागले आहे. त्याचप्रमाणे रावसाहेब दानवे सुद्धा ग्रामीण भागातील तरुण कार्यकर्त्यांना एकत्र आणत निवडणुकीसाठी तयार करताना पाहायला मिळत आहे. विशेष म्हणजे थेट कार्यकर्त्यांसोबत डब्बा पार्टी करण्याचा त्यांचा पॅटर्न सद्या चर्चेचा विषय बनला आहे. तर पक्षातील तरुण कार्यकर्त्यांमध्ये यामुळे उत्साह वाढतांना सुद्धा पाहायला मिळत आहे.