चालत्या बसमध्ये महिला करायच्या असं काही काम, पोलिस सुद्धा चक्रावले...

औरंगाबाद : वैजापूर पोलिसांनी पाठलाग करुन तीन महिलांना अटक केली असून, त्यांचा गुन्हा पाहून अनेकांना धक्काच बसला आहे. वैजापूर बसस्थानकांत गर्दीचा फायदा घेऊन महिलांच्या अंगावरील मौल्यवान दागिने हातचलाखी करुन या महिला चोरी करायच्या. अलका विजय खंदारे (५०), अर्चना धरमा राखपसरे (२८) व सखुबाई किशोर सकट (४०, सर्व रा. नेवासा) अशी या महिला चोरांची नावे आहेत..

याबाबत अधिक माहिती अशी की, राहिबाई लक्ष्मण जगधने (६५, रा. सुदामवाडी) या बुधवारी दुपारी दोन वाजेच्या सुमारास कोपरगाव येथे जाण्यासाठी वैजापूर बसस्थानकात आल्या होत्या. बस येताच जागा पकडण्यासाठी त्यांनी बसमध्ये प्रवेश केला. बसमध्ये चढताना प्रवाशांची गर्दी असल्याने तीन महिला त्यांना 'पुढे चला, पुढे चला' असे म्हणून लोटू लागल्या. यापैकी एका महिलेने त्यांच्या गळ्यातील मणिमंगळसूत्र ओरबाडले. सदरील प्रकार राहिबाई यांच्या लक्षात आल्याने त्यांनी चोर चोर अशी आरडाओरड करण्यास सुरुवात केली. मात्र बघ्यांची गर्दी जमल्याने त्या महिलेसह इतर दोघीही बसमधून उतरून पळून फरार झाल्या. तर याच गडबडीत कनकसागज येथील विठाबाई लाड या महिलेच्या गळ्यातील सुद्धा सोन्याचे मणिमंगळसूत्र चोरी गेल्याचे समोर आले.

त्यामुळे याची माहिती तात्काळ वैजापूर पोलिसांना देण्यात आली. पोलिसांनी बसस्थानकातील सीसीटीव्ही फुटेजची तपासणी केली. यात या महिला वैजापूर गंगापूर बसमध्ये बसून फरार झाल्याचे लक्षात आल्यानंतर पोलिस गंगापूरच्या दिशेने बसचा पाठलाग करण्यासाठी निघाले. तसेच पोलिसांनी बसच्या वाहकाशी मोबाइलद्वारे संपर्क साधून घटनेबाबत माहिती देऊन बस थांबविण्यास सांगितलं. त्यामुळे वाहकाने महालगाव येथे बस थांबवली, परंतु त्या वेळी बसमधून तीन महिला उतरून पळून जाऊ लागल्या. याच वेळी वैजापूर पोलिसांचे पथक तिथे आले आणि तिन्ही महिलांना ताब्यात घेतले. तसेच त्यांच्या ताब्यातून चोरी केलेले दागिने हस्तगत करुन त्यांच्याविरुद्ध वैजापूर पोलिस ठाण्यात गुन्हा दाखल केला.