घरावर फुटबॉल मारला, महिला बाहेर येताच अश्लील हावभाव, मद्यधुंद पोलीस कर्मचाऱ्यावर गुन्हा

औरंगाबाद : मद्यधुंद अवस्थेत असलेल्या पोलीस कर्मचाऱ्याने एका सोसायटीत जाऊन तिथे राहणाऱ्या महिलांच्या घरावर फुटबॉल फेकून मारला. त्यानंतर त्यांच्याकडे अश्लील नजरेने पाहत शिवीगाळ केल्याचा आरोप होत आहे. हा प्रकार औरंगाबादमधील जवाहर कॉलनी भागातील मयुरबन कॉलनीत समोर आला आहे. या घटनेनंतर महिलांनी पोलीस ठाणे गाठत तक्रार दिली. बराच वेळ जवाहरनगर पोलिस ठाण्यात महिलांनी ठिय्या मांडला होता.

महिलांनी केलेली तक्रार अशी की, औरंगाबाद शहर पोलिस दलात कार्यरत असलेले कर्मचारी अनिल बोडले हे संध्याकाळी जवाहरनगर कॉलनी भागात असलेल्या मयूरबन कॉलनी भागात दारूच्या नशेत आले. त्यावेळी त्यांनी परिसरात राहणाऱ्या महिलांच्या घरावर फुटबॉल मारले.

आवाजाने महिला घरातून बाहेर आल्यास पोलीस त्यांच्याकडे अश्लील नजरेने पाहत होता. असा प्रकार त्यांनी सोसायटीच्या अनेक महिलांसोबत केला. या नंतर महिलांनी एकत्र येत जाब विचारण्याचा प्रयत्न केला असता कर्मचारी अनिल बोडले यांनी महिलांना शिवीगाळ करीत धमकी दिली. तसेच मोबाईलद्वारे महिलांचे व्हिडिओ रेकॉर्डिंग देखील केल्याचा आरोप केला जात आहे.

या प्रकारानंतर सोसायटी मधील महिलांनी जवाहरनगर पोलिस ठाणे गाठले. पोलीस कर्मचारी अनिल बोडेले याच्या विरोधात तक्रार करण्यासाठी या महिल्या एकत्रित जमल्या होत्या. बोडेले विरोधात महिलांनी तक्रार दिली असून पोलीस पुढील चौकशी करीत आहेत.

परिसरात जेव्हा बोडेले शिवीगाळ करीत होते या सर्व घटनेचा एक व्हिडिओ सध्या व्हायरल होत आहे. यापूर्वी देखील बोडेले यांनी सोसायटी मध्ये दारू पिऊन धिंगाणा केला होता. या बाबत सोसायटी कार्यालयाकडून नोटीस देखील देण्यात आली होती. अशी माहिती महिलांनी पोलिसांना दिली आहे. मात्र या घटनेमुळे पोलीस दलात एकच खळबळ उडाली आहे.