हिंगोलीत लॉकडाऊनचा फज्जा; बाजारात उसळली गर्दी

हिंगोली: हिंगोली जिल्ह्यात करोनाचे रुग्ण वाढत आहेत. त्यामुळे जिल्ह्यात लॉकडाऊन व संचारबंदीची काटेकोरपणे अंमलबजावणी करण्याचे प्रशासनाचे आदेश आहेत. असे असतानाही बाजारांमधील गर्दी कमी होताना दिसत नसून आज हिंगोलीच्या बाजारपेठेत बंदी आदेश झुगारून खरेदीसाठी मोठी गर्दी झाल्याचे पाहायला मिळाले.

सतर्क राहा! करोना व्हायरसची ६ नवीन लक्षणे

पंधरा दिवसांपूर्वी हिंगोली जिल्ह्यात एकही करोनाबाधित रुग्ण नव्हता. मात्र, जिल्ह्यात करोनाने नकळत शिरकाव केला आणि आता जिल्ह्यात करोनाबाधित रुग्णांची संख्या १४ वर पोहचली आहे. त्यामुळे अधिक खबरदारी घ्यावी लागणार आहे.

मालेगाव, सातारा, अकोल्यात ४५ करोनाबाधित

जिल्ह्यात संचारबंदी व आपत्कालीन कायदा लागू करण्यात आला असून एक दिवसाआड जीवनावश्यक वस्तू खरेदीसाठी नागरिकांना सूट देण्यात आली आहे. परंतु याचा गैरफायदा घेतला जात असल्याचे दिसून येत आहे. आज सकाळी नऊ ते दुपारी एक दरम्यान जीवनावश्यक वस्तूंच्या खरेदीसाठी सूट देण्यात आलेली असताना नागरिकांनी गांधी चौक, जवाहर रोड परिसरात खरेदीसाठी मोठी गर्दी केली होती. त्यामुळे जिल्ह्यात लागू केलेल्या लॉकडाऊनचा फज्जा उडाल्याचे दिसून आले.

बाजारपेठेतील गर्दी कमी न झाल्यास जिल्ह्यात करोनाचा धोका आणखी वाढण्याची भीती आहे. ही बाब लक्षात घेऊन शहरातील सुज्ञ नागरिकांनी प्रशासनाकडे विनंती करत बंदी आदेशाची कठोरपणे अंमलबजावणी करण्याची मागणी केली आहे.

नांदेडहून पंजाबला पोहचलेले ८ जण करोनाबाधित