साहेब लवकर निवडणूक जाहीर करा, आरक्षणानुसार लग्न करायचंय, तरुणाचं भन्नाट निवेदन...

छत्रपती संभाजीनगर: मला तीन आपत्य असल्यामुळे मी निवडणूक लढविण्यास अपात्र आहे. परंतू मी निवडणुक लढविण्यासाठी उमेदवार बायको पाहिजे असे बॅनर शहरात लावले होते. त्याला प्रतिसाद म्हणून संपूर्ण महाराष्ट्रातून मला ५ ते ६ हजार महिलांचे फोन आले. त्यातील तीन महिला निवडणूक लढविण्यासाठी तयार आहेत. कारण, मला लग्न करायचे आहे आणि मला निवडणूक लढविण्यासाठी बायको मिळालेली आहे.

यासाठी महानगरपालिकेने लवकरात लवकर निवडणूक जाहीर करावी. अशी मागणी शहरातील एका तरुणाने निवेदनाद्वारे विभागीय आयुक्त, जिल्हाधिकारी, सह मनपा आयुक्तांकडे केली आहे. हे निवेदन सध्या जिल्ह्यात चर्चेचा विषय बनली आहे.

शहरातील दलालवाडी भागात राहणारा तरुण रमेश पाटील याला मानपाची निवडणूक लढवायची होती. मात्र, कोरोना आणि इत्यादी कारणामुळे मनपा निवडणूक पुढे ढकलल्या गेल्या. लॉकडाऊनच्या तिसरे पाटील यांना तिसरे अपत्य झाले आणि त्यांचं निवडणूक लढविण्याचं स्वप्न भंगलं. त्यानंतर वर्षभरापूर्वी त्यांनी शहरातील विविध भागाता 'बायको पाहिजे' म्हणून होर्डिंग्ज लावले होते. त्याला प्रतिसाद मिळाले आणि तब्बल पाच ते सहा हजार महिलांनी संपर्क केला.

त्यातून तीन वेगवेगळ्या संवर्गातील महिला लग्न करण्यास तयार झाल्या आहेत. मात्र, निवडणूकच लागत नसल्याने लग्न करता येत नाही. वॉर्ड जसे आरक्षित होईल त्या आरक्षण प्रमाणे मी त्या संवर्गातील महिलेशी लग्न करणार आहे. त्यासाठी मी विभागीय आयुक्त, जिल्हाधिकारी आणि मनपा आयुक्त यांना लेखी स्वरूपाची मागणी केली आहे. माझी मागणी लवकरात लवकर पूर्ण झाली नाही, तर मी संपूर्ण शहरात होर्डिंग्ज लावणार आहे, अशी माहिती निवेदनकर्ता रमेश पाटील यांनी महाराष्ट्र टाइम्स ऑनलाईनशी बोलताना दिली.