म. टा. प्रतिनिधी, औरंगाबाद
राज्यातील व्यवसाय शिक्षण व प्रशिक्षण विभागातंर्गत अभ्यासक्रमांचे कौशल्य विकास व उद्योजकता विभागात समावेश करण्यात आले. मात्र, अभ्यासक्रमांच्या मागचे शुक्लकाष्ट संपायला तयार नाही. विभागातील एचएससी व्होकेशनल अभ्यासक्रमाच्या शिक्षकांना तब्बल तीन महिन्यांपासून पगार मिळालेला नाही. वर्षभरापासून पगारात आलेली अनियमितता यामुळे या अभ्यासक्रमाचे शिक्षक, शिक्षकेतर कर्मचारी आर्थिक अडचणीत सापडले आहेत.
दहावीनंतर विद्यार्थ्यांना विविध कौशल्याभिमुख अभ्यासक्रम शिकता यावेत, यासाठी किमान कौशल्यावर आधारित व्यावसाय अभ्यासक्रमांना (एमसीव्हीसी) प्रवेश घेता येतो. पूर्वी उच्चशिक्षण विभागाशी जोडलेला हा विभाग आता कौशल्य विकास व उद्योजकता विभागाशी जोडण्यात आला आहे. त्यानंतर आता या अभ्यासक्रमाच्या शिक्षकांचा प्रश्न समोर आला आहे. वर्षभरापासून या अभ्यासक्रमाच्या शिक्षकांच्या पगारा नियमितता नाही. त्यात मागील तीन महिन्यांपासूनचा पगार या शिक्षक, शिक्षकेतर कर्मचाऱ्यांना मिळाला नसल्याचे सुत्रांनी सांगितले. पगारातील अनियमितता, त्यात तीन महिन्यांपासून पगार नसल्यामुळे या अभ्यासक्रमाच्या शिक्षक, शिक्षकेतर कर्मचाऱ्यांवर उपासमारीची वेळ आली आहे. जून, जुलै आणि ऑगस्टचा पगार झालेला नसल्याचे शिक्षकांनी सांगितले. मराठवाड्यात एमसीव्हीसी शिक्षक, निदेशक, शिपाई, लिपीकांची संख्या सहा हजाराच्या घरात आहे.
३५
औरंगाबादमध्ये शाळा, कॉलेज
४००
शिक्षक संख्या
१५०
मराठवाड्यात कॉलेज
२०००
शिक्षक, शिक्षकेतर कर्मचारी
एमसीव्हीसी अभ्यासक्रमाच्या शिक्षकांच्या वेतनात वर्षभरापासून अनियमितता आलेली आहे. त्यात तीन महिन्यांपासून तर पगारच झालेला नाही. सहसंचालक कार्यालय वरिष्ठांना विचारा असे सांगतात, वरिष्ठ पातळीवरूनही योग्य उत्तरे दिले जात नाहीत. हा प्रश्न त्वरीत मार्गी न लागण्यास शिक्षक, कर्मचारी रस्त्यावर उतरतील.
- डॉ. मनोहर वानखडे,
मराठवाडा अध्यक्ष,
महाराष्ट्र व्होकेशन टिचर्स असोसिएशन