औरंगाबादसह मराठवाड्यासाठी म्हाडाची मोठी घोषणा; नऊशेवर सदनिकांसाठी सोडत जाहीर

म. टा. प्रतिनिधी, औरंगाबादः म्हाडाच्या औरंगाबाद गृहनिर्माण व क्षेत्रविकास मंडळातर्फे प्रधानमंत्री आवास योजना (शहरी) व म्हाडाच्या गृहनिर्माण योजनेअंतर्गत औरंगाबाद, लातूर, जालना, परभणी, नांदेड, हिंगोली, उस्मानाबाद येथे उभारलेल्या ९३६ सदनिकांच्या विक्रीकरिता ऑनलाइन अर्ज नोंदणीला सुरवात करण्यात आली आहे. औरंगाबाद मंडळाच्या मुख्यालयात मंगळवारी झालेल्या या कार्यक्रमाला औरंगाबाद मंडळाचे मुख्य अधिकारी अण्णासाहेब शिंदे, शहर अभियंता अविनाश देशमुख, निवृत्त जिल्हा न्यायाधीश शेटे, अप्पर जिल्हाधिकारी अनंत गव्हाणे, देखरेख समितीचे सदस्य आदी उपस्थित होते.

औरंगाबाद गृहनिर्माण व क्षेत्रविकास मंडळातर्फे जाहीर करण्यात आलेल्या विविध गृहनिर्माण योजनेअंतर्गत ९३६ सदनिकांपैकी ६०५ सदनिका प्रधानमंत्री आवास योजना (शहरी) अंतर्गत आहेत. म्हाडा गृहनिर्माण योजनेअंतर्गत अत्यल्प उत्पन्न गटासाठी ३८ सदनिका, अल्प उत्पन्न गटासाठी ६५ सदनिका, मध्यम उत्पन्न गटासाठी १५१ सदनिका, उच्च उत्पन्न गटासाठी ३ सदनिका उपलब्ध करून देण्यात आल्या आहेत. सर्व उत्पन्न गट या गटांतर्गत ७४ सदनिका असून या गटासाठी उत्पन्न मर्यादा शिथिल करण्यात आली आहे. सोडतीसाठी अर्ज नोंदणीकरिता ०२२६९४६८१०० व ऑनलाइन पेमेंट करिता ८८८८०८७७६६ या हेल्पलाइन क्रमांकावर संपर्क साधण्याचे आवाहन मुख्य अधिकारी शिंदे यांनी केले आहे. नऊ फेब्रुवारीच्या दुपारी १२ वाजेपासून ऑनलाइन अर्ज सादर करता येणार असून १० मार्च रात्री ११.५९ वाजेपर्यंत ऑनलाइन अर्ज करण्याची अंतिम मुदत आहे.

१३ मार्चला अनामत रकमेचा भरणा अर्जदारांना करता येणार असून सर्व कागदपत्रांची पूर्तता करणारे अर्जदारच या प्रणालीद्वारे पात्र ठरविले जाणार आहेत. तर सोडतीसाठी पात्र अर्जांची अंतिम यादी १८ मार्चला सायंकाळी ६ वाजता म्हाडाच्या https://housing.mhada.gov.in या अधिकृत संकेतस्थळावर केली जाणार आहे. तर २२ मार्च, २०२३ रोजी औरंगाबाद येथील मराठवाडा महसूल प्रशिक्षण प्रबोधिनी येथे २२ मार्चला सकाळी ११ वाजता पात्र अर्जदारांची संगणकीय सोडत जाहीर केली जाणार आहे, अशी माहितीही म्हाडातर्फे देण्यात आली आहे.