एमआयएमच्या नगरसेवकाचा नियमित जामीन फेटाळला
म टा...
म. टा. प्रतिनिधी, औरंगाबाद
शहरात नुकत्याच उसळलेल्या दंगलीच्या प्रकरणामध्ये सध्या न्यायालयीन कोठडीत असलेला एमआयएमचा विरोधी पक्षनेता फेरोज मोईनोद्दीन खान याचा नियमित जामीन अर्ज जिल्हा व सत्र न्यायाधीश जयंत राजे यांनी गुरुवारी (३१ मे) फेटाळला.
शहरात उसळलेल्या दंगलीच्या काळात दीपक मन्नालाल जैस्वाल यांच्या बिअर बारच्या गोडाऊनमधील विदेशी मद्याच्या साठ्याची तोडफोड करून पेटवून दिल्याच्या; तसेच जैस्वाल यांचे घर पेटवून दिल्यासंदर्भात दाखल गुन्ह्यात आरोपी फेरोजखान हा १५ मे रोजी पोलिसांना शरण आला होता. या प्रकरणी कोर्टाने त्याला १८ मे पर्यंत पोलिस कोठडी सुनावली होती व त्यानंतर त्यांची न्यायालयीन कोठडीत रवानगी करण्यात आली होती. दरम्यान, त्याने नियमित जामिनासाठी अर्ज दाखल केला असता, त्या अर्जावरील सुनावणीवेळी अतिरिक्त जिल्हा सरकारी वकील सतीश मुंडवाडकर पाटील यांनी कोर्टाच्या निदर्शनास आणून दिले की, गुप्त बातमीदाराकडून पोलिसांना मिळालेल्या माहितीनुसार, अर्जदाराने (फेरोजखान) जमावाला भडकावले होते. या गुन्ह्यात फेरोजखानच्या ७ साथीदारांना १७ मे रोजी अटक करण्यात आली असून त्यांच्या तपासात फेरोज खानने चिथावणी दिल्याचे निष्पन्न झाले आहे. आरोपीचे आणखी १४ साथीदार फरार आहेत. त्यांचा शोध घेऊन त्यांना अटक करणे बाकी आहे. आरोपीला जामीन दिल्यास तो त्यांना फरार होण्यास मदत करील. आरोपीने तरुणांचे डोके भडकावून, कट रचून दंगल घडवून आणल्याचे तपासात निष्पन्न झाले आहे. भविष्यातही दंगल घडवण्याची शक्यता नाकारता येत नाही. दंगलीच्या काळात नागरिकांच्या सुमारे ७ कोटींच्या मालमत्तेचे नुकसान झाले व एकाचा होरपळून मृत्युही झाला. आरोपी व त्याच्या साथीदारांनी जनतेच्या मालमत्तेची तोडफोड व जाळपोळ करुन लुटमार केली. त्यांच्याकडून लुटलेला माल हस्तगत करणे बाकी असल्यामुळे आरोपीला जामीन मंजूर करू नये, अशी विनंतीही सरकारी पक्षातर्फे कोर्टात करण्यात आली. ही विनंती मान्य करुन कोर्टाने आरोपी फेरोज खानचा जामीन अर्ज फेटाळला.
....