हेमामालिनीही रोज पितात दारू...: बच्चू कडू

मटा ऑनलाइन वृत्त । नांदेड

शेतकरी दारू पिऊन आत्महत्या करतात, या विधानावर आमदार बच्चू कडू यांनी वादग्रस्त प्रतिक्रिया दिली आहे. अभिनेत्री हेमामालिनीही रोज दारू पितात; त्यांनी तर आत्महत्या केली नाही, असे कडू प्रसारमाध्यमांसमोर बोलले. शेतकरी आत्महत्यांमागच्या कारणांसंबंधी ते बोलत होते. शेतकरी दारूमुळे आत्महत्या करतात हे विधान त्यांना खोडून काढायचे होते.

बच्चू कडू यांच्या या विधानामुळे नवा वाद निर्माण होण्याची चिन्हे आहेत. आपल्या आक्रमक शैलीतील भाषणांमुळे कडू नेहमीच चर्चेत असतात. आज त्यांना शेतकरी आत्महत्यांसंदर्भात प्रसारमाध्यमांनी प्रश्न विचारले, तेव्हा शेतकरी दारू पिऊन आत्महत्या करतात, या विधानावर तीव्र प्रतिक्रिया व्यक्त करताना त्यांची जीभ घसरली आणि त्यांनी अभिनेत्री हेमा मालिनीचे उदाहरण दिले. ते म्हणाले, हेमा मालिनी रोज दारू पितात, पण त्यांनी अजून आत्महत्या केली नाही.

शेतकरी दारूमुळे आत्महत्या करतात हे विधान त्यांना खोडून काढायचे होते, पण त्यासाठी रागाच्या भरात त्यांनी 'हेमा मालिनीही दारू पितात, त्यांनी आत्महत्या केली का?,' असे विधान केले. '७५ टक्के आमदार, खासदार दारू पितात, नेत्यांच्या मुलांच्या लग्नाचा खर्च कोट्यवधी असतो. याचा अर्थ असा नव्हे की शेतकऱ्यांनी दारू पिऊ नये आणि त्यांनी आपल्या मुलाबाळांची लग्नेही करू नयेत, असेही ते म्हणाले.