म. टा. प्रतिनिधी औरंगाबाद
चोरीच्या दुचाकीचा वापर करून तरुणांचे मोबाइल पळवणाऱ्या आरोपीला क्रांतीचौक पोलिसांनी अटक केली आहे. या आरोपीने दोन मोबाइल पळवल्याची कबुली देत चोरीच्या दोन दुचाकी देखील पोलिसांच्या स्वाधीन केल्या आहेत. क्रांतीचौक पोलिस ठाण्याच्या गुन्हे प्रकटीकरण पथकाने ही कारवाई केली. या आरोपीच्या एका अल्पवयीन साथीदाराला पोलिसांनी पूर्वीच ताब्यात घेतले आहे.
निराला बाजार परिसरातील तापडिया नाट्य मंदिरापासून पाच डिसेंबर २०१८ रोजी प्रवीण त्रिंबक निकम (वय २६, रा. समर्थनगर) या तरुणाचा मोबाइल दुचाकीवर आलेल्या दोघांनी पळवला होता. याप्रकरणी निकमच्या तक्रारीवरून क्रांतीचौक पोलिस ठाण्यात जबरी चोरीचा गुन्हा दाखल करण्यात आला होता. आरोपीच्या दुचाकी क्रमांकावरून पोलिस वाळूज येथे पोचले. ही दुचाकी अशोक शेळके नावाच्या व्यक्तीची असून, त्यांचा मुलगा चालवत असल्याची माहिती मिळाली होती. या माहितीवरून पोलिसांनी त्यांच्या अल्पवयीन मुलाला ताब्यात घेतले. यावेळी चौकशीत त्याने हे गुन्हे त्याचा साथीदार ज्ञानेश्वर माणिकराव गरड (रा. वाळूज) याच्या मदतीने केल्याची कबुली दिली; तसेच औरंगपुरा देवगिरी बँकेजवळून देखील अशाच पद्धतीने आणखी एक मोबाइल पळवल्याचे सांगितले.
या माहितीवरून पोलिसांनी ज्ञानेश्वर गरड याला अटक केली. चोरलेला एक मोबाइल त्यांनी (निलजगाव ता. पैठण) येथील एका तरुणाला दिल्याची माहिती दिली. पोलिसांनी हा मोबाइल त्या तरुणाकडून जप्त केला. पोलिस चौकशीत आणखी एका दुचाकी चोरीची माहिती त्यांनी देत ही दुचाकी पोलिसांच्या स्वाधीन केली. आरोपींकडून दोन मोबाइल चोरी आणि दोन दुचाकी चोरीचे गुन्हे पोलिसांनी उघडकीस आणले. ही कारवाई पोलिस उपनिरीक्षक कैलास पवार, राजेश फिरंगे, गजानन मांटे, संतोष रेड्डी, राजेश चव्हाण, सतिश जाधव, गणेश वाघ, रमेशलाल जैस्वाल, दिलीप जाधव आणि देवानंद मरसाळे यांनी केली.
…
\Bनंबर प्लेट टाकल्याने अडकले
\Bपोलिसांनी पूर्वी ताब्यात घेतलेल्या अल्पवयीन आरोपीच्या वडिलांच्या दुचाकीचा क्रमांक आरोपींनी चोरीच्या दुचाकीच्या क्रमांकासाठी वापरला होता. यामुळे पोलिस आरोपीपर्यंत पोचले. आरोपीच्या वडिलांची दुचाकी फायनांन्स कंपनिने जप्त केली आहे. पोलिसांनी दोन्ही दुचाकींची माहिती काढली असता त्यावरील नंबर प्लेट बनावट असून, चिकलठाणा व सिडको पोलिस ठाणे हद्दीतून त्यांनी या दुचाकी चोरलेल्या आहेत.