खळबळ; पालिका प्रशासक, पोलिस अधीक्षक क्वारंटाइन

म. टा. प्रतिनिधी, औरंगाबाद

महापालिकेचे प्रशासक आस्तिककुमार पाण्डेय यांच्या घरातील स्वयंपाक्यास करोनाची लागण झाल्याचे स्पष्ट झाले आहे. त्यामुळे पाण्डेय, त्यांची पत्नी ग्रामीण पोलिस अधीक्षक मोक्षदा पाटील, सहा वर्षांचा मुलगा व कुटुंबातील इतर सदस्यांना क्वारंटाइन करण्यात आले आहे. दोन्ही अधिकारी व त्यांच्या कुटुंबियांच्या लाळेचे नमुने चार दिवसांनंतर घेतले जाणार आहेत.

पाण्डेय हे पत्नी पोलिस अधीक्षक पाटील यांच्या सिडकोतील शासकीय निवासस्थानीच राहतात. तेथे घरकामासाठी कर्मचारी नियुक्त केले आहेत. येथील सर्व कर्मचाऱ्यांचे महापालिकेच्या पथकाने मंगळवारी (२३ जून) स्वॅब घेतले होते. त्याचा अहवाल बुधवारी (२४ जून) प्राप्त झाल्यानंतर एका स्वयंपाक्याचा अहवाल पॉझिटिव्ह असल्याचे स्पष्ट झाले, अशी माहिती महापालिकेच्या आरोग्य वैद्यकीय अधिकारी डॉ. नीता पाडळकर यांनी दिली. त्या स्वयंपाक्यास महापालिकेच्या कोविड रुग्णालयात दाखल केले आहे. त्यानंतर पाण्डेय, त्यांच्या पत्नी सहा वर्षांचा मुलगा व इतर कुटुंबियांना क्वारंटाइन केल्याची माहिती त्यांनी दिली.

पालिकेत खळबळ
करोना प्रादुभार्वामुळे पालिकेचे प्रशासकच क्वारंटाइन झाल्याने महापालिका वर्तुळात खळबळ उडाली आहे. प्रशासकांना किमान १४ दिवस क्वारंटाइन होऊन घरीच राहावे लागणार आहे.