लाखाची लाच घेताना पालिकेचा अभियंता अटकेत

म. टा. प्रतिनिधी, औरंगाबादः एका घराच्या भिंतीवर लाल खूण करून रस्त्याच्या कामासाठी बांधकाम पाडण्याची धमकी देऊन अडीच लाख रुपयांमधील पहिला हफ्ता म्हणून एक लाख रुपये स्वीकारणाऱ्या महापालिकेतील अतिक्रमण विभागाच्या शाखा अभियंत्याला लाच लुचपत प्रतिबंधक विभागाने अटक केली. शाखा अभियंत्यासोबत एका खासगी व्यक्तीलाही अटक करण्यात आली.

अटक केलेल्या शाखा अभियंत्याचे नाव वामन कांबळे (वय ५६) असे आहे. या प्रकरणात लाचलुचपत प्रतिबंधक विभागाकडून देण्यात आलेल्या माहितीनुसार, एका रस्त्याच्या कामामध्ये तक्रारदाराचे घर येत असल्याचे दाखवून अतिक्रमण पथकाच्या शाखा अभियंत्यांनी घरावर लाल रंगात खूण केली होली. हे बांधकाम पाडणार असल्याचीही धमकी दिली. 'घर पाडायचे नसेल तर, अडीच लाख रुपये दया,' अशी मागणी महापालिकेच्या अतिक्रमण हटाव पथकाचे शाखा अभियंता वामन कांबळे आणि खासगी व्यक्ती विजय हरिचंद्र निकाळजे (रा. भीमनगर) यांनी केली होती. यासाठी अडीच लाख रुपयांची मागणी केली. याबाबत संबंधित घर मालकाने लाचलुचपत प्रतिबंधक विभागाकडे या प्रकरणाची तपासणी केली. या तपासणीत महापालिकेच्या शाखा अभियंता वामन कांबळे यांनी लाच मागितल्याचे स्पष्ट झाले.

या प्रकरणात रविवारी (१५ डिसेंबर) रोजी सापळा रचून वामन राघोबा कांबळे याला तक्रारदाराकडून एक लाख रुपयाची लाच स्वीकारताना विजय निकाळजे याच्यासह अटक केली आहे. ही कारवाई पोलिस निरीक्षक उन्मेष थिटे, पोलिस कर्मचारी दिगंबर पाठक, सुनील पाटील, सुनील जोशी, पी. आर. घुगरे, के. आर. म्हस्के, कपील गाडेकर, ए. यू. शेख यांनी केली. या प्रकरणात दोघा आरोपींच्या विरोधात क्रांतीचौक पोलिस ठाण्यात गुन्हा दाखल करण्यात आला आहे.