nagarpanchayat election 2022: सोयगाव नगरपंचायत निवडणूक; सत्तार-दानवेंची प्रतिष्ठा पणाला

औरंगाबादः राज्य निवडणूक आयोगाने एकूण १०६ नगरपंचायतींच्या निवडणुका जाहीर केल्या होत्या, त्यानुसार २१ डिसेंबर आणि १८ जानेवारी या दोन टप्प्यात निवडणुका पार पडल्या असून, या सर्वांचे निकाल आज स्पष्ट होणार आहे. तर अनेक महत्त्वाच्या राजकीय नेत्यांची प्रतिष्ठा या निकालामुळे पणाला लागली आहे. औरंगाबाद येथील सोयगाव नगरपंचायतमुळे ठाकरे सरकारमधील राज्यमंत्री अब्दुल सत्तार तर केंद्रीय राज्यमंत्री रावसाहेब दानवे यांनी प्रतिष्ठा पणाला लागली असून, या नगरपंचायतची सत्ता कुणाच्या ताब्यात जाणार, हे आज स्पष्ट होणार आहे.

सत्तार यांच्या विधानसभा आणि दानवे यांच्या लोकसभा मतदारसंघात असलेल्या सोयगाव नगरपंचायतीच्या एकूण १७ जागांसाठी दोन टप्प्यात मतदान झाले. पहिल्या टप्प्यात २१ डिसेंबर रोजी १३ जागांसाठी तर १८ जानेवारीला ०४ जागांसाठी निवडणूक पार पडली. आज या सर्वांचे निकाल लागणार असून, सोयगाव नगरपंचायतीवर शिवसेना-भाजपपैकी कुणाचा झेंडा फडकतो याकडे सर्वांचे लक्ष लागले आहे.

सत्तार-दानवे आमनेसामने...…

अब्दुल सत्तार आणि रावसाहेब दानवे यांचे राजकीय शत्रुत्व काही लपलेलं नाही. मात्र गेल्यावेळी शिवसेना-भाजपची युती असल्यामुळे सोयगाव नगरपंचायतवर युतीची सत्ता होती. मात्र यावेळी हे दोन्ही पक्ष आमने-सामने असून, काँग्रेसचा गट शिवसेनेच्या बाजूने आहे. त्यामुळे सोयगाव नगरपंचायतीवर सत्तार की दानवे यापैकी कोण बाजी मारतं हे पाहणं महत्त्वाचं ठरणार आहे.

दरम्यान, राज्यात विविध जिल्ह्यांमधील ९३ नगरपंचायतींच्या ३३६ जागांसाठी मंगळवारी सरासरी ८१ टक्के, तर विदर्भातील भंडारा आणि गोंदिया जिल्हा परिषदेच्या २३ आणि त्याअंतर्गतच्या पंचायत समितीच्या ४५ जागांसाठी ७३ टक्के मतदान झाल्याचा प्राथमिक अंदाज आहे, असे राज्य निवडणूक आयोगाकडून सायंकाळी सांगण्यात आले. या सर्व ठिकाणी बुधवारी सकाळी १० वाजता मतमोजणीस सुरुवात होईल. राज्यात आज सगळीकडे निवडणुकीच्या निकालाची रणधुमाळी पाहायला मिळेल.