लाच: पोलिसाने आरोपीच्या आईचं मंगळसूत्र विकलं

मटा ऑनलाइन वृत्त । नांदेड

पाच हजार रूपयांची लाच देण्यासाठी नांदेडमधील एका पोलिसाने आरोपीला त्याच्या आईचं मगळसूत्र विकण्यास भाग पाडल्याची धक्कादायक घटना उघडकीस आली आहे. या प्रकरणी या भ्रष्ट पोलिसाला एसीबीनं ताब्यात घेतलं असून त्याची चौकशी सुरू आहे. मात्र या घटनेमुळे नांदेड पोलिसांची अब्रु मात्र वेशीला टांगली गेली आहे.

रामदास (नाव बदललेले आहे) असे या आरोपीचे नाव आहे. तो मोलमजुरी करून गुजराण करतो. गेल्या काही दिवसांपासून त्याचे आणि त्याच्या पत्नी खटके उडत होते. रागाच्या भरात त्याच्या पत्नीनं त्याच्याविरोधात उमरी पोलीस स्थानकात तक्रार दाखल केली. त्यानंतर पोलीस हवालदार उद्धव घुले यांनी रामदासला अटक करण्याची धमकी देत अटक टाळण्यासाठी ५ हजार रुपयाची लाच मागितली. एवढे पैसे नसल्याचं सांगूनही घुले ऐकत नव्हते. त्यामुळे आपल्या आईचे मंगळसूत्र विक्री करूनच रक्कम उभी करावी लागेल, असं रामदासनं घुले याना सांगितले. तरीही घुले यांना दया आली नाही. उलट हवालदार घुले याने मंगळसूत्र विक्रीतून आलेले पैसे तात्काळ जमा करण्यास सांगितले.

अखेर रामदासनं सोनाराकडं मंगळसूत्र विकून ५ हजार ७०० रूपये मिळविले. पण एकानं सल्ला देताच रामदासनं एसीबीला संपर्क साधून त्यांना संपूर्ण प्रकार कळवला. एसीबीनेही सापळा रचून मध्यस्थ अशोक चव्हाण यांच्या मार्फत ५ हजाराची लाच स्वीकारताना मध्यस्थ आणि हवालदार उद्धव घुले यांना ताब्यात घेतलं.