नांदेड-वाघाळा पालिकेत काँग्रेसची आघाडी

मटा ऑनलाइन वृत्त । नांदेड

संपूर्ण राज्याचं लक्ष वेधल्या गेलेल्या नांदेड-वाघाळा महापालिका निवडणुकीच्या ८१ जागांसाठी मतमोजणी सुरू झाली आहे. मतमोजणीच्या ताज्या आकडेवारीनुसार काँग्रेस ६६ जागांवर विजयी झाली असून भाजपचा आतापर्यंत पाचच जागांवर विजय झाला आहे. त्यामुळं नांदेड महापालिकेवर काँग्रेसचं वर्चस्व कायम राहणार असल्याची चिन्हं दिसत आहेत.

आज सकाळी नांदेड-वाघाळा महापालिकेच्या मतमोजणीला सुरुवात झाली. काँग्रेसनं आतापर्यंत तब्बल ४७ जागांवर आघाडी घेतली असून पैकी ६६ जागांवर विजय मिळविला आहे. सत्ता मिळवण्याचा दावा केलेल्या भाजपची पीछेहाट दिसत आहे. तर शिवसेनेला केवळ एकाच जागी विजय प्राप्त झाला आहे. नांदेड महापालिकेसाठी बुधवारी ६० टक्के मतदान झाले होते. माजी मुख्यमंत्री अशोक चव्हाण यांनी शहरी भागातील भाजपची घोडदौड रोखली आहे. मुख्यमंत्री देवेंद्र फडणवीस, एमआयएमच्या ओवेसी बंधूंनी स्वत: सभा घेऊन प्रचारात रंगत आणली होती. उद्धव ठाकरे यांनी सभा घेऊनही शिवसेनेला अपेक्षेपेक्षा कमी यश मिळणार अशी चिन्हं आहेत.

एकूण २० प्रभागांतील ८१ जागांसाठी मतमोजणी सुरू आहे. या निवडणुकीत ५७८ उमेदवार आपलं नशीब आजमवत आहेत. नांदेडमधील प्रभाग क्रमांक दोनमध्ये मतदानासाठी व्हीव्हीपॅट मशीन वापरण्यात आल्या होत्या. एकूण ३७ मशीन होत्या. त्यातील ६ बंद झाल्याने नेहमीच्या इव्हीएमवर मतदान घेण्यात आले होते. आज केवळ ३१ व्हीव्हीपॅट मशीनवरील मोजणी होत आहे.

व्हीव्हीपॅट मशीनवर ज्या प्रिंट निघाल्या त्यांची देखील मोजणी होणार आहे. निवडणूक आयोगाने तशी परवानगी दिली आहे. याचा अर्थ मशीनवर झालेले मतदान आणि ट्रे मध्ये असलेल्या प्रिंट तपासल्या जातील. जर त्याची जुळणी झाली तर इव्हीएम मशीनवरील संशय कायमचा संपेल. नांदेडचा हा व्हीव्हीपॅटचा प्रयोग यशस्वी झाला तर यापुढे देशभरातील निवडणुकीत व्हीव्हीपीएटी मशीनचा वापर होईल, असं सूत्रांनी सांगितलं.