नवीन अधिष्ठातांची विद्यापीठात नियुक्ती

औरंगाबाद : डॉ. बाबासाहेब आंबेडकर मराठवाडा विद्यापीठात चार प्रभारी अधिष्ठाता यांची नियुक्ती करण्यात आली आहे.
डॉ.बाबासाहेब आंबेडकर मराठवाडा विद्यापीठाचा ५७व्या दीक्षांत समारंभ येत्या ३० मे रोजी होणार अाहे. नवीन विद्यापीठ कायद्याप्रमाणे यापुढे चारच विद्याशाखा असणारा आहेत. या पार्श्वभूमीवर कुलगुरू डॉ बी ए चोपडे यांनी बुधवारी (२४ मे) या नियुक्त्या करण्यात आल्याची घोषणा केली.
त्यामध्ये डॉ. वाल्मिक सरवदे (वाणिज्य व व्यवस्थापनशास्त्र), डॉ. दिलीप खैरनार (कला व सामाजिक शास्त्रे - मानव्यविद्या शाखा) डॉ. मझहर फारुकी (विज्ञान व तंत्रज्ञान विद्याशाखा) व डॉ संजय साळुंके (आंतर विद्याशाखा) यांचा समावेश आहे. डॉ प्रदीप जब्दे यांच्या स्वाक्षरीने त्यांना बुधवारी सायंकाळी पत्र देण्यात आले. डॉ. सरवदे हे वाणिज्य विभागात प्राध्यापक म्हणून कार्यरत असून, व्यवस्थापनशास्त्र विभागाचे संचालक आहेत. डॉ. खैरनार हे देवगिरी महाविद्यालयात समाजशास्त्र विभागप्रमुख तर डॉ. मझहर फारुकी हे डॉ. रफिक झकेरिया महिला महाविद्यालयात कार्यरत आहेत. डॉ. साळुंके हे समाजशास्त्र विभागात प्राध्यापक आहेत. ३१ ऑगस्ट २०१७ किंवा नवीन पूर्णवेळ अधिष्ठांताची नियुक्ती होईपर्यंत ते कार्यरत राहणार आहेत. प्रभारी अधिकारी डॉ. सतीश पाटील व परीक्षा मंडळाचे संचालक डॉ. राजेश रगडे यांनी त्यांचे अभिनंदन केले आहे.