म. टा. प्रतिनिधी, औरंगाबाद
वाढते अपघात, शिकार आदी कारणांमुळे गेल्या नऊ महिन्यांत औरंगाबाद उप वनसंरक्षक कार्यालयाच्या कार्यक्षेत्रात बिबट्या, निलगायीसह २७ वन्यप्राण्यांचा जीव गेला. यात एका मोर आणि काळविटाची शिकार झाल्याचेही समोर आले आहे.
उप वन संरक्षक (प्रादेशिक) औरंगाबाद कार्यालयाच्या कार्यक्षेत्रात औरंगाबादसह जालना जिल्ह्याचा समावेश येतो. या जिल्ह्यात अनुक्रमे ९२ हजार ८५२ आणि ९ हजार ९९६ हेक्टरवर वनक्षेत्र विस्तारले आहेत. या क्षेत्रात अनेक वन्यप्राणी असून, गेल्या काही महिन्यात घडलेल्या घटनांमुळे हे प्राणी सुरक्षित आहेत का असा प्रश्न निर्माण झाला आहे. वन खात्याच्या सूत्रांनी दिलेल्या माहितीनुसार, जानेवारी २०१९पासून ते आतापर्यंत या कार्यक्षेत्रात १६ काळविटांचा मृत्यू झाला. दोन हरीण, सहा निलगायी, एक अस्वल आणि दोन बिबटे आणि एक मोर अशा एकूण २७ वन्यप्राण्यांचा विविध कारणांमुळे मृत्यू झाला आहे. यात एक काळवीट आणि मोराची शिकार करण्यात आल्याचे समोर आले असून, याप्रकरणी गुन्हा दाखल केला आहे.
गंगापूर तालुक्यातील कायगाव शिवारात कलमीच्या ओढ्याजवळ रोड ओलांडत असतानाच बिबट्याला भरधाव जाणाऱ्या वाहनाने धडक दिल्याची घटना चार महिन्यांपूर्वी घडली होती. यात साडेतीन ते चार वर्षे वयाच्या नर बिबट्याचा मृत्यू झाला होता. दोन दिवसांपूर्वी नगर रोडवरच वाहन अपघातात एक काळवीट ठार झाले. पाण्याच्या शोधात असलेला एक अस्वल विहिरीत पडून मृत्यूमुखी पडल्याची घटना अजिंठा वन क्षेत्रात जानेवारी महिन्यात घडली होती. दोन काळविटाचा मृत्यूही अशाच प्रकारे विहिरीत पडल्याने झाला आहे. कुत्र्यांनी केलेल्या हल्ल्यात एक निलगाय ठार झाल्याची घटना आडूळ भागात घडली होती. गिरनेर येथे हरणाचा मृत्यू झाला होता. जालना जिल्ह्यातील देवमूर्ती येथे सहा काळवीट मृतावस्थेत आढळून आले होते. दूषित पाण्यामुळे त्याचा मृत्यू झाल्याचे सूत्रांनी सांगितले. असाच प्रकार जुलैमध्ये निलमगाव येथे समोर आला. शिवना गावाजवळ मृतावस्थेत आढळून आलेल्या एका निलगायीचे पाय कापून नेल्याची घटना दहा मार्च २०१९ रोजी समोर आली होती.
जखमी प्राण्यांना तातडीने वैद्यकीय मदत मिळावी, यासाठी कोणत्याही प्रकाराची यंत्रणा वन खात्याकडे नाही, असा आरोपही वन्यजीव प्रेमींकडून केला जात आहे. प्राण्यांवर उपचारासाठी यंत्रणा उभारण्यात यावी, अशी मागणी केली आहे. वनखात्याचे फिरते पथके नेमके काय काम करते, असा प्रश्नही यानिमित्ताने उपस्थित झाला आहे.