\Bम. टा. प्रतिनिधी, औरंगाबाद
\B'महिला सुरक्षेसाठी प्राथमिकता देत औरंगाबाद शहर पोलिसांनी 'निर्भया सेफ सिटी' प्रकल्प तयार केला आहे. त्यातून अद्ययावत तंत्रज्ञान, स्मार्ट पोलिसिंग आणि तात्काळ मदत दिली जाईल. केवळ महिलाच नव्हे तर संकटात सापडलेल्या प्रत्येकाच्या सुरक्षेसाठीच्या या प्रकल्पाचा प्रस्ताव शासनाकडे पाठवला आहे. तो मंजूर होईल,' असा विश्वास सहाय्यक पोलीस आयुक्त डॉ. नागनाथ कोडे यांनी बोलून दाखवला.
जिल्हा माहिती कार्यालयाच्या वतीने शनिवारी जिल्हाधिकारी कार्यालयात महिला सुरक्षा विषयावर कार्यक्रम घेण्यात आला. यावेळी ते बोलत होते. व्यासपीठावर अॅड. अर्चना गोंधळेकर, माहिती कार्यालयाचे मराठवाडा संचालक गणेश रामदासी आणि जिल्हा माहिती अधिकारी मुकुंद चिलवंत होते. यावेळी डॉ. कोडे म्हणाले, 'अलीकडच्या काळात महिलांवरील गुन्ह्यांचे प्रमाण कमी झाले आहे. पोलिसांच्या वेगवेगळ्या हेल्पलाइनद्वारे वेळोवेळी मदत पोचवली जाते. कॉल आल्यावर पाच ते सात मिनिटांत पोलिस पोचतात. १०० नंबरवर महिला पोलीस जाणीवपूर्वक फोन उचलतात. निर्जन स्थळ, बसस्टॉप, सार्वजनिक ठिकाणी सीसीटीव्ही कॅमेऱ्यात वाढ करून २५०० कॅमेरे बसवले जातील. रात्री पोलिसांची गस्त वाढवली आहे. उशिरा जीवनावश्यक मदत मागणाऱ्या कॉलवरही आम्ही मदत केली. शहर भयमुक्त, सुरक्षित करण्यासाठी शहर पोलिस दक्ष असून महिलांनी कोणताच किंतू न ठेवता मदत मागावी. १००, १०९१, ८३९००२२२२२, ९१५९०४२४४४ या नंबरवर मदत मागा असे आवाहन कोडे यांनी केले. 'पुरूषप्रधान संस्कृती पकड मजबूत असल्याने स्त्रिया आणि मुले आजही दुय्यम स्थानीच आहेत,' अशी खंत अॅड. अर्चना गोंधळेकर यांनी बोलून दाखवली. चिलवंत यांनी आभार व्यक्त केले.
\Bप्रस्तावात काय?
\B- सार्वजनिक ठिकाणे, सार्वजनिक वाहनांवर सीसीटीव्ही आणि पीझेड २५०० कॅमेरे बसवणे
- डेटा लीक होऊ नये म्हणून डेटा मॉनिटरिंग आणि डेटा सेव्ह करण्यासाठी स्वतंत्र उपाययोजना
- शहरातील २० निर्जन ठिकाणांवर महिला स्वच्छतागृह बांधणे.
- महिला पोलिसांच्या वाहनांवर माऊंटेड कँमेरा ( चहूबाजूंनी घटना कैद करणारे तंत्रज्ञान) बसवणे
निर्भया सेफ सिटी प्रकल्प शहर पोलिसांनी अतिशय बारकाईने तयार केला आहे. यामध्ये अतिशय अद्ययावत तंत्रज्ञानावर आधारित कॅमेरा, सुरक्षाप्रणाली आणि नो नेटवर्क एरियाचा पुरेपूर विचार केला आहे. यासाठी निर्जन ठिकाणांवर पुरेशी सुरक्षा आणि महिला स्वच्छतागृहाचा प्रस्ताव ठेवला. अगदी मोबाइल उपलब्ध नसला तरी ८९ ठिकाणी अर्लार्मिंग सिस्टीम उपलब्ध केले जाईल. केवळ एक बटन दाबून महिलाच नव्हे तर संकटात सापडलेले कुणीही मदत मागू शकतात.
\B- डॉ. नागनाथ कोडे, सहाय्यक पोलिस आयुक्त
\B