म. टा. प्रतिनिधी, औरंगाबाद
अवैध वृक्ष तोड केल्याप्रकरणी वृक्ष प्राधिकरणाने 'एमटीडीसी' विभागाला कारणे दाखवा नोटीस बजावली असून, खुलासा आल्यानंतर कायदेशीर कारवाई करू, अशी माहिती महापालिका उद्यान विभागाच्या अधिकाऱ्यांनी 'मटा'शी बोलताना दिली.
एकीकडे वृक्ष लागवडीसाठी शासनस्तरावर महाअभियान राबविले जात असतानाच दुसरीकडे मात्र शासनाच्याच महाराष्ट्र राज्य पर्यटन विभागाच्या गेस्ट हाऊस परिसरात अवैध वृक्षतोड करण्यात आल्याचे प्रकरण सात जुलै रोजी समोर आले आहे. देशी-परदेशी पर्यटकांचे नेहमी वास्तव्य असलेल्या या गेस्ट हाऊस परिसरात अनेक मोठी झाडे आहेत. त्यापैकी काही वृक्ष येथील प्रशासकीय अधिकाऱ्यांच्या आदेशाने तोडण्यात आली. हा प्रकार लक्षात येताच वृक्षप्रेमी विवेक ढाकणे व रवी चौधरी यांनी तातडीने महापालिकेच्या अधिकाऱ्यांना कल्पना देत घटनास्थळी धाव घेतली. उद्यान विभागाचे कृषी सहायक डी. आर. निंबाळकर, नामदेव राऊत यांच्यासह वृक्षप्रेमी एमटीडीसी कार्यालय परिसरात दाखल झाले व त्यांनी वृक्षतोड रोखली. मात्र, तोपर्यंत सफेदा, सुबाभूळची प्रत्येकी एक झाड तोडण्यात आले होते. तर पथक आल्याचे लक्षात येताच होताच वृक्षतोड करणारे कंत्राटदार पसार झाले होते.
\Bपरवानगीही घेतली नाही
\Bकाही वृक्ष जुनाट असल्याने धोका निर्माण झाला होता. त्यामुळे सुरक्षेच्या दृष्टीने गुलमोहरसह अन्य झाडांच्या फांद्यात तोडल्या आहेत. त्यासाठी वृक्ष प्राधिकरण विभागाकडे अर्ज करण्यात आल्याचा दावा एमटीडीसीचे व्यवस्थापक विजय जाधव यांनी केला आहे. तर वृक्ष तोडीसाठी कोणत्याही प्रकारची परवानगी मागितली नव्हती. तशी देण्यात आलेलीही नाही, अशी माहिती उद्यान विभागाचे अधीक्षक विजय पाटील यांनी 'मटा'शी बोलताना दिली. अवैध वृक्षतोडप्रकरणी शुक्रवारपर्यंत खुलासा येणे अपेक्षित आहे. आलेले उत्तर वृक्ष प्राधिकरण समितीसमोर ठेवून त्यानंतर पुढील कायदेशीर कारवाई केली जाईल, असेही त्यांनी नमूद केले.