म. टा. प्रतिनिधी, औरंगाबाद
बँक अधिकारी बोलत असल्याचे थाप मारून विद्यार्थ्याच्या बँक खात्यातून ऑनलाइन साडेसहा लाख रुपये लांबवण्यात आले. हा प्रकार १९ जून ते २४ जून यादरम्यान घडला. याप्रकरणी अज्ञात आरोपीविरुद्ध सायबर पोलिस ठाण्यात फसवणुकीचा गुन्हा दाखल करण्यात आला आहे.
याप्रकरणी अक्षय संतोष काथार (वय २१, रा. न्यू गजानन कॉलनी, गारखेडा) या विद्यार्थ्याने तक्रार दाखल केली. अक्षय हा एका अभियांत्रिकी कॉलेजमध्ये शिक्षण घेत आहे. इंडियन ओव्हरसिज बँकेत त्याचे खाते असून, त्याचे 'एटीएम कार्ड' त्याच्याकडे आहे. १९ जून रोजी सकाळी पावणेनऊ वाजता अक्षयच्या मोबाइलवर एका अनोळखी मोबाइलधारकाचा कॉल आला. समोरील व्यक्तीने अक्षयला इंडियन ओव्हरसिज बँकेचा अधिकारी बोलत असल्याची थाप मारली. 'तुमच्या एटीएम कार्डवर तुमचे नाव नमूद नसल्याने तुम्हाला कार्ड तात्काळ बदलून घ्यावे लागेल. दोन दिवसांत तुम्हाला परत कॉल करून अधिक माहिती देतो किंवा तुम्ही बँकेत जाऊन नवीन कार्ड घेऊ शकता,' असे सांगत कार्डचा पिन क्रमांक विचारला. अक्षयला बँकेचा अधिकारी असल्याचा विश्वास बसल्याने त्याने कार्डचा 'यूपीआय पिन' क्रमांक सांगितला. त्यानंतर अक्षयच्या मोबाइल क्रमांकावर आलेल 'ओटीपी' देखील त्याने विचारला असता अक्षयने तो देखील सांगितला. यानंतर समोरील भामट्याने, 'तुमचे नवीन कार्ड बनवायचे असून, तोपर्यंत कोणतेही बँकेचे व्यव्हार करू नका. तुमचा मोबाइल क्रमांक बंद ठेवा,' असे सांगितले. त्याच्या सांगण्यावरून अक्षयने मोबाइल क्रमांक बंद ठेवला. यानंतर २५ जून रोजी अक्षय गारखेडा येथील 'एटीएम'मध्ये पैसे काढण्यासाठी गेला असता त्याच्या खात्यावर पैसे शिल्लक नसल्याचे दिसून आले. त्याने इंडियन ओव्हरसिज बँकेच्या शाखेत जाऊन व्यवस्थापकाची भेट घेत याबाबत विचारणा केली. यावेळी त्याला दाखवण्यात आलेल्या स्टेटमेंटमध्ये त्याच्या खात्यातून पेटीएम बँक आणि एयरटेल पेमेंट बँक याच्यावर ऑनलाइन सहा लाख ५९ हजार रुपये वळते करण्यात आल्याचे दिसून आले. हा प्रकार १९ जून ते २४ जून यादरम्यान घडला होता. याप्रकरणी अक्षयच्या तक्रारीवरून साबयर पोलिस ठाण्यात गुन्हा दाखल करण्यात आला असून, पोलिस निरीक्षक कैलास देशमाने तपास करीत आहेत.