म. टा. प्रतिनिधी, औरंगाबाद
बँकेत रक्कम जमा करण्यासाठी गेलेल्या धूत मोटर्सच्या कर्मचाऱ्याला भामट्याने एक लाखाचा गंडा घातला. हा प्रकार शनिवारी दुपारी समर्थनगरातील एका बँकेत घडला. मालकाला साडेचार लाख रुपये द्यायचे असल्याची थाप मारत कर्मचाऱ्याकडील एक लाख आरोपीने लंपास केले. या प्रकरणी क्रांतीचौक पोलिस ठाण्यात गुन्हा दाखल करण्यात आला आहे.
या प्रकरणी राजू नंदराम बकले (वय ४९ रा. हर्सूल) यांनी तक्रार दाखल केली आहे. ते अदालत रोडवरील धूत मोटर्समध्ये कर्मचारी आहेत. ते शनिवारी दुपारी समर्थनगरातील एका बँकेत एक लाख रुपये भरण्यासाठी गेले होते. यावेळी एक अनोळखी व्यक्ती त्यांच्याजवळ आली. या व्यक्तीच्या अंगात काळा टी शर्ट, जीन्स पँट घातलेली असून डोळ्यावर चष्मा होता. त्याने बकले यांना तुमच्या मालकाला मला चार लाख ४० हजार रुपये द्यायचे आहे. यापैकी एक लाख ७० हजारांचा चेक आता देतो व उर्वरित दोन लाख ७० हजार रुपये माझ्या समोर असलेल्या कार्यालयातून घेऊन जा, असे सांगत बकले यांच्याजवळील एक लाख रुपये मी बँकेत भरतो, असे म्हणत ताब्यात घेतले. बकले हे समोर असलेल्या एका कार्यालयात गेले असता त्यांनी धूत मोटर्सशी आपला कोणताही व्यव्हार झाला नसल्याची माहिती दिली. बकले पुन्हा बँकेत येईपर्यंत तो पसार झाला होता. आपली फसवणूक झाल्याचे लक्षात आल्यानंतर बकले यांनी क्रांतीचौक पोलिस ठाणे गाठून गुन्हा दाखल केला. याप्रकरणी सहायक फौजदार धर्मराज देशमुख तपास करीत आहेत.