एक रेमडेसिव्हिर ३५ हजारांना

म. टा. प्रतिनिधी, औरंगाबादः रेमडेसिव्हिर इंजेक्शनचा सध्या बाजारात काळाबाजार सुरू आहे. सिडको एन ४ भागात मिठाईच्या दुकानासमोर इंजेक्शन विक्रीसाठी आलेल्या संदीप अप्पासाहेब चवळी (२५, रा. भाग्योदयनगर) आणि गोपाल हिरालाल गांगवे (१९, रा. सातारा परिसर) या दोघांना गुन्हे शाखेच्या पोलिसांनी ताब्यात घेतले. त्यांच्याकडून सहा इंजेक्शन जप्त करण्यात आली. एक इंजेक्शन ते ३५ हजार रूपयांना विकत असल्याचेही उघड झाले.

गुन्हे शाखेचे सहाय्यक पोलिस निरीक्षक मनोज शिंदे यांनी मिळालेल्या माहितीवरून औषध निरीक्षक जीवन जाधव, पोलिस अंमलदार संतोष सोनवणे, चंद्रकांत गवळी, भगवान शिलोटे, रितेश जाधव, विशाल पाटील, आनंद वाहुळ, राजकुमार सूर्यवंशी, शिनगारे यांच्यासह सापळा लावला. दोन मोटारसायकलवर दोघे मिठाईच्या दुकानाच्या बाजूला आले. तेथे चौकशी करून त्यांना ताब्यात घेण्यात आले. दोघे पॅथॉलॉजी लॅबमध्ये काम करतात. ही इंजेक्शने शेळके (रा. परभणी) याच्याकडून खरेदी केल्याची माहिती त्यांनी दिली. पुंडलिकनगर पोलिस ठाण्यात गुन्हा दाखल करण्यात आला आहे.

पंधरा दिवसांत दुसरी कारवाई

शहरात रेमडेसिव्हिर विकणाऱ्या एका विक्रेत्याला ताब्यात घेऊन गुन्हे शाखेने तब्बल सहा जणांना अटक केल्याची कारवाई केली होती. या प्रकरणी बेगमपुरा पेालिस ठाण्यात गुन्हा दाखल करण्यात आला असून या इंजेक्शनचा काळाबाजार करणाऱ्या आरोपींना सशर्त जामीन मिळाला आहे. या कारवाईत जालना कोव्हिड सेंटर येथून इंजेक्शन आणून विक्री केली जात असल्याची माहिती समोर आली होती.

दोघांकडून काळ्या बाजारात विकली जाणारी रेमेडेसिव्हिर इंजेक्शने जप्त करण्यात आली.