मराठवाड्यात सापडले केवळ ३९३ बाधित

म. टा. प्रतिनिधी, औरंगाबाद

मराठवाड्यातील करोना रुग्णांत घट कायम असून मंगळवारी (२७ ऑक्टोबर) आठही जिल्ह्यात ३९३ नवीन बाधित आढळले. विविध रुग्णालयात उपचार घेत असलेल्या २४ करोनाबाधितांचा गेल्या २४ तासांत मृत्यू झाला. गेल्या महिन्याभरात एकाच दिवशी आढळणाऱ्या रुग्णांची ही सर्वात कमी संख्या आहे.

गेल्या २४ तासांत सर्वाधिक १०९ बाधित औरंगाबाद जिल्ह्यात, तर सर्वात कमी केवळ पाच बाधित हिंगोली जिल्ह्यात आढळले. नव्याने आढळलेल्या करोनाबाधितांमध्ये १७१ रुग्ण हे मराठवाड्याच्या शहरी, तर २२२ रुग्ण ग्रामीण भागातील आहेत. यामध्ये नांदेड जिल्ह्यात ४२, परभणी २३, लातूर ७६, जालना ३४, बीड ६९, तर उस्मानाबाद जिल्ह्यात ३५ नवीन बाधित आढळले. आतापर्यंत आठही जिल्ह्यात करोनाची एक लाख २५ हजार १३७ जणांना बाधा झाली. त्यापैकी एक लाख १४ हजार ७०३ बाधितांवर यशस्वी उपचार करण्यात आले. आतापर्यंत आठही जिल्ह्यात ३६६४ करोनाबाधितांचा मृत्यू झाला आहे.

\Bमृत्यूचे भय कायम \B

रुग्णसंख्या सातत्याने कमी होत असली तरी गंभीर रुग्णांच्या मृत्यूची संख्या अद्याप २० ते २४ च्या आसपास आहे. मंगळवारी सकाळी नऊ वाजेपर्यंत सर्वाधिक आठ मृत्यू उस्मानाबाद जिल्ह्यात झाले. औरंगाबाद जिल्ह्यात तीन, नांदेड व हिंगोली जिल्ह्यात प्रत्येकी दोन, लातूरमध्ये पाच, तर बीड जिल्ह्यात चार करोनाबाधितांचा मृत्यू झाला.