म. टा. प्रतिनिधी, औरंगाबाद -
दिंडोरी प्रणित श्री स्वामी समर्थ अध्यात्मिक व बाल संस्कार केंद्राच्या माध्यमातून शनिवारी (२२ सप्टेबर) सामूहिक गणपती अथर्वशीर्ष पठण कार्यक्रमाचे आयोजन करण्यात आले आहे. सरस्वती भुवन मैदानावर सकाळी सव्वासात वाजता सामूहिक गणपती अथर्वशीर्ष पठणाला सुरुवात होणार आहे. या कार्यक्रमात २५ हजार भाविक सहभागी होतील व भाविकांची ही उपस्थिती विक्रमी असेल, असे मानले जात आहे. या कार्यक्रमाला शिवसेना नेते खासदार चंद्रकांत खैरे, श्री स्वामी समर्थ केंद्राचे मराठवाडा प्रतिनिधी विलासराव देशमुख, सरस्वती भुवन शिक्षण संस्थेचे सहचिटणीस डॉ. श्रीरंग देशपांडे, शिवसेनेचे महानगरप्रमुख प्रदीप जैस्वाल, आमदार संजय शिरसाट, महापौर नंदकुमार घोडेले, जिल्हापरिषद अध्यक्ष अॅड. देवयानी डोणगावकर प्रमुख पाहुणे म्हणून उपस्थित राहणार आहेत. या कार्यक्रमात विद्यार्थी, पालकांनी मोठ्या संख्येने सहभागी व्हावे, असे आवाहन संयोजकांतर्फे करण्यात आले आहे.