गावाबाहेरील पैलवानाने कुस्ती जिंकल्याचा राग; पैलवानांना मारहाण

म. टा. प्रतिनिधी, औरंगाबादः देवळाई परिसराजवळील आडगाव येथे कुस्त्यांच्या दंगलीमध्ये गावाबाहेरील पैलवानाने कुस्ती जिंकल्याच्या रागातून पैलवानासह अन्य काही जणांना मारहाण करण्यात आली. या घटनेत तीन जण जखमी झाले असून, दोन जण बेपत्ता आहेत.

या प्रकरणी देवळाईच्या रहिवाशांनी दिलेल्या माहितीनुसार, आडगाव येथे कुस्त्यांची दंगल ठेवण्यात आली होती. मंगळवारी झालेल्या या दंगलीत देवळाईचा पैलवान जुबेर शेख याने कुस्त्यांची बाजी मारली. यासह एक अन्य स्पर्धेत मुद्दस्सीर याने कुस्ती जिंकली. बाहेरच्या गावाचे पैलवान कशी कुस्ती जिंकतात, असा आरोप करत काही जणांनी त्यांच्याबरोबर वाद घातला आणि त्यांना मारहाण केली.

या घटनेमध्ये जुबेर, अबुजर इद्रीस खान, अब्दुल सलीम हे तिघे जखमी झाले. त्यांना उपचारासाठी घाटी रुग्णालयात दाखल करण्यात आले. याशिवाय मुद्दस्सीर इद्रीस खान आणि समीर अयुब खान हे दोघे बेपत्ता आहेत. या घटनेची माहिती देवळाईतील नागरिकांना मिळाल्यानंतर त्यांनी चिकलठाणा पोलिस ठाण्यात धाव घेऊन संबंधितांवर कारवाईची मागणी केली. रात्री उशिरापर्यंत या प्रकरणात गुन्हा दाखल करण्यात आला नव्हता.

स्पर्धेला परवानगी कशी?

कुस्त्यांच्या स्पर्धेवरून औरंगाबाद शहराजवळील दोन गावांमध्ये वाद निर्माण झालेला आहे. गर्दीचे सर्व कार्यक्रम रद्द झालेले असताना, या कुस्त्यांचे स्पर्धा कशा घेण्यात आल्या? असा प्रश्न ग्रामस्थांकडून विचारण्यात येत आहे.

चिकलठाणा पोलिस ठाण्यासमोर गर्दी

मारहाणीची घटना झाल्यानंतर देवळाई भागातील अनेक नागरिक पोलिस ठाण्यासमोर जमा झाले होते. त्यांनी बेपत्ता झालेल्या युवकांचा शोध घेण्याची मागणी केली. तसेच मारहाण करणाऱ्यांवर कारवाईची मागणी केली.