चिंता वाढली! ऑक्सीजन बेड, ICU बेड, सज्ज ठेवा; औरंगाबाद जिल्हाधिकार्‍यांच्या आरोग्य यंत्रणेला सूचना

औरंगाबाद : राज्यात ओमिक्रॉनच्या रुग्णांची वाढती संख्या आणि औरंगाबाद जिल्ह्यात कोरोनाच्या रुग्णात होणारी वाढ पाहता जिल्हा टास्क फोर्स समितीने घेतलेल्या निर्णयांची अंमलबजावणी काटेकोरपणे करण्याचे निर्देश आज झालेल्या कोविड टास्क फोर्सची बैठकीत जिल्हाधिकारी सुनील चव्हाण यांनी दिले.

या बैठकीत शहरातील चौकाचौकात विनामास्क फिरणाऱ्या नागरिकांना दंड करणे, प्रत्येक तालुका आरोग्य अधिकारी यांच्या समन्वयाने खासगी रुग्णालयात ओपीडी बरोबरच आरटीपीसीआर तपासणी सक्तीची करावी, कोविड पॉझिटिव्ह अहवाल प्राप्त नागरिकांचे गृह विलगीकरण बंद करुन संस्थात्मक विलगीकरण करण्याच्या सूचना जिल्हाधिकारी यांनी दिल्या.

तसेच, ओमायक्रॉन संसर्ग तपासणीमध्ये महत्वच्या 'जिनोम सिक्वेन्सींग' तपासणीसाठी प्रयोगशाळेचा प्रस्ताव तयार करून शासनास पाठविण्याचे निर्देश घाटी प्रशासनाला देण्यात आले. डिसेंबर माहिन्याअखेर मोठे उत्सव, लग्न समारंभ, आणि अनावश्यक गर्दीच्या कार्यक्रमाचे आयोजन न करण्याचे निर्देशही जिल्हाधिकारी चव्हाण यांनी दिले.

जिल्हयात कोविड चाचण्या वाढवाव्यात, ज्या नागरिकांचा दुसरा डोस राहिलेला आहे त्यांनी तो तात्काळ घ्यावा, लसीकरणासाठी अधिकचे मनुष्यबळ उपलब्ध करुन देण्यात येईल असेही त्यांनी सांगितले. तसेच ऑक्सीजन बेड, आणि आयसीयु बेड, यासह विशेष बेडची सुविधा सज्ज ठेवण्याबाबत यावेळी आरोग्य यंत्रणेला सूचित करण्यात आले.