म. टा. प्रतिनिधी, औरंगाबाद
'उद्घाटक तुमचे, अध्यक्ष आमचे,' असे म्हणत शिवसेनेने काँग्रेस आणि 'एमआयएम'सोबत 'पॅचअप' केल्याचे चित्र आहे. 'एमआयएम'च्या खासदारांना उद्घाटन म्हणून किंवा कार्यक्रमाचे अध्यक्ष म्हणून बोलवणे शिवसेनेच्या स्थानिक नेते व पदाधिकाऱ्यांना पचनी पडत नव्हते. आता त्यांनी अचानक 'यू टर्न' घेतला आहे.
लोकसभा निवडणुकीत एमआयएमचे इम्तियाज जलील विजयी झाले. शिवसेनेचे चंद्रकांत खैरे यांचा पराभव झाला. हा पराभव खैरे यांच्या जिव्हारी लागला. या निवडणुकीनंतर महापालिकेत होणाऱ्या प्रत्येक कार्यक्रमासाठी जलील यांना बोलावणे टाळले जाऊ लागले. प्राणिसंग्रहालयातील समृद्धी या वाघिणीने चार बछड्यांच्या नामकरणाच्या कार्यक्रमाला इम्तियाज जलील यांना बोलावण्यात आले नाही. खैरेंनी बछड्यांचे नामकरण केले. या कार्यक्रमात शिवसेना, एमआयएम असा संघर्ष झाला. रोज गार्डनच्या उद्घाटनाच्या कार्यक्रमाच्या पत्रिका देखील याच संघर्षातून तीन वेळा बदलण्यात आल्या. रोज गार्डन 'एमआयएम'चे नगरसेवक नासेर सिद्दिकी यांच्या वॉर्डात आहे. त्यामुळे गार्डनचे उद्घाटन इम्तियाज जलील यांच्याच हस्ते झाले पाहिजे, असा त्यांचा आग्रह होता. जलील यांच्या हस्ते उद्घाटन न केल्यास कार्यक्रम उधळून लावू, असा इशारा त्यांनी दिला होता. त्यामुळे आतापर्यंत रोज गार्डनचे उद्घाटन झालेले नाही.
महापालिका निवडणूक एप्रिल महिन्यात होत आहे. त्यामुळे आचारसंहितेपूर्वी उद्घाटनाचे जास्तीत जास्त कार्यक्रम घेण्याचे नियोजन करण्यात आले आहे. त्यातच आयुक्तांनी सर्व विभागप्रमुखांना पत्र पाठवून कार्यक्रमाची पत्रिका तयार करताना राजशिष्टाचार पाळलाच पाहिजे, अशी तंबी दिली आहे. त्यामुळे महापौर नंदकुमार घोडेले यांनी आयुक्त आस्तिककुमार पांडेय यांच्याशी या बद्दल चर्चा केली. उद्घाटक व कार्यक्रमाचे अध्यक्ष ठरवण्याचे अधिकार महापौरांचे आहेत. उद्घाटक व अध्यक्ष वगळता उर्वरित कार्यक्रम पत्रिका राजशिष्टाचारानुसार तयार करा, असे त्यांनी आयुक्तांना सांगितले.
राष्ट्रीय नागरी आरोग्य अभियानांतर्गत (एनयूएचएम) बांधण्यात आलेल्या चार हॉस्पिटलचे लोकार्पण २९ व ३० जानेवारी रोजी केले जाणार आहे. २९ जानेवारी रोजी गणेश कॉलनी, मध्यवर्ती जकात नाका आणि अल्तमश कॉलनी येथील हॉस्पिटलचे लोकार्पण खासदार इम्तियाज जलील यांच्या हस्ते केले जाणार असून, अध्यक्षस्थानी शिवसेनेचे नेते चंद्रकांत खैरे असतील, असे महापौरांनी सांगितले. ३० जानेवारी रोजी सादातनगर येथील हॉस्पिटलचे लोकार्पण सार्वजनिक बांधकाम मंत्री अशोक चव्हाण यांच्या हस्ते केले जाणार असून, या कार्यक्रमाच्या अध्यक्षस्थानी देखील खैरे असणार आहेत. सादातनगर वॉर्डातून काँग्रेसचा नगरसेवक निवडून आला असून, अन्य तीन वॉर्डांमधून 'एमआयएम'चे नगरसेवक निवडून आले आहेत.