जालना रोडवर पुन्हा ठिगळपट्टी

औरंगाबाद ः खड्ड्यांनी त्रस्त असलेल्या औरंगाबादकरांना थोडा दिलासा देण्यासाठी सार्वजनिक बांधकाम विभागाने रविवारी जालना रस्त्यावर पुन्हा ठिगळपट्टी केली. गेल्या काही महिन्यांपासून जालना रस्त्यावरील जीवघेणे खड्डे औरंगाबादकरांची डोकेदुखी बनले आहेत.

शहरातील सर्वाधिक रहदारीच्या जालना रस्त्यावर गेल्या काही महिन्यांत मोठ्या प्रमाणावर खड्डे पडले आहेत. महावीर चौक ते चिकलठाणा या मार्गावरील दोन्ही बाजूच्या रस्त्याची चाळणी झाली आहे. खड्ड्यातून वाट काढताना वाहनधारकांना तारेवरची कसरत करावी लागत आहे. हा रस्ता महापालिकेच्या हद्दीत असूनही देखभाल व दुरुस्तीसाठी सार्वजनिक बांधकाम विभागाच्या अखत्यारित आहे. तीन वर्षांपूर्वी या रस्त्याची दुरुस्ती करण्यात आली होती. गेल्या काही दिवसांत जालना रस्त्यावर पुन्हा खड्डे पडले. पावसाळ्यात रस्त्याची डागडुजी करता येत नाही. त्यामुळे दोन वेळा खडी, माती टाकून खड्डे बुजविले गेले, पण त्यानंतर झालेल्या जोरदार पावसाने हजेरी लावल्याने खड्डे उघडे पडले. दोन दिवसांपासून पावसाने उघडीप दिल्यामुळे रविवारी सार्वजनिक बांधकाम विभागाने खडी, डांबर टाकून खड्डे बुजविले. पावसाळा संपल्यानंतर रस्त्याचे डांबरीकरण केले जाण्याची शक्यता आहे.