प्लास्टिक बंदी कागदोपत्री

म. टा. प्रतिनिधी, औरंगाबाद :

महापौर नंदकुमार घोडेले यांनी केलेली प्लास्टिक बंदीची घोषणा महापालिकेच्या प्रशासनाने कागदोपत्रीच असल्याचे आपल्या कृतीतून स्पष्ट केले. बाजारपेठांमध्ये जाऊन जप्तीची कारवाई करण्यापेक्षा प्लास्टिक बंदीची कारवाई करण्याचे लेखी आदेश विविध विभागात पाठवण्यात आले.

कचराकोंडीवर तोडगा काढण्यासाठी महापौरांनी मंगळवारी नगरसेवकांची बैठक आयोजित केली होती. याबैठकीत भाजपच्या नगरसेविका अॅड. माधुरी अदवंत यांनी प्लास्टिक बंदीचा मुद्दा मांडला. प्लास्टिक बंदी केली तर मोठा प्रश्न बऱ्याच प्रमाणात सुटेल, असे त्या म्हणाल्या होत्या. महापौर घोडेले यांनी लगेचच प्लास्टिक बंदीचे आदेश दिले. बुधवारपासून कारवाई सुरू करा, असेही त्यांनी अधिकाऱ्यांना सांगितले. अधिकाऱ्यांनी मात्र महापौरांचे आदेश कागदोपत्रीच घेतले. प्रत्यक्ष कोणतीच कारवाई पालिकेच्या अधिकाऱ्यांनी केली नाही. प्लास्टिक बंदीचे काम आरोग्य विभागाचे की घनकचरा विभागाचे असा प्रश्न निर्माण करण्यात आला आहे. प्लास्टिक बंदीबाबतचे लेखी आदेश बुधवारी घनकचरा व्यवस्थापन विभागाला देण्यात आले.