पोलिसांना राखी बांधून साजरी केली राखी पौर्णिमा

म. टा. प्रतिनिधी, औरंगाबाद

बंदोबस्तावरील पोलिसांना सण साजरे करण्याचे प्रकार दुर्मिळच म्हणावे लागतील. रविवारी भावा-बहिणीच्या प्रेमाचा राखी पौर्णिमेचा सण सर्वत्र साजरा करण्यात आला. नागेश्वरवाडी वॉर्डाच्या नगरसेविका कीर्ती शिंदे यांनी पोलिस अधिकारी, कर्मचाऱ्यांना राखी बांधून अगळ्या पद्धतीने हा सण सादरा केला.

नगरसेविका शिंदे यांनी राखी पौर्णिमेनिमित्त शहरातील सिटीचौक, क्रांतीचौक पोलिस ठाण्याला भेट दिली. येथील सर्वच कर्मचाऱ्यांना त्यांनी औक्षण करीत राख्या बांधल्या. सिल्लेखाना चौकात पोलिसांचा फिक्स पॉइंट आहे. या पॉइंटवरील कर्मचाऱ्यांना देखील नगरसेविका शिंदे यांनी राखी बांधली. शिंदे यांच्या या उपक्रमामुळे पोलिस बांधव देखील भारावून गेले. पोलिस बांधव २४ तास समाजाचे रक्षण करतात. त्यांच्याबद्दल कृतज्ञता व्यक्त करण्यासाठी राखी बांधली. यामध्ये एक वेगळी आनंदाची अनुभूती मिळाली. आपल्या शहरातील सर्व माता भगिनीचे आजपर्यंत करीत आहात तसेच रक्षण करावे, अशी ओवाळणी यावेळी मागितल्याचे नगरसेविका शिंदे यांनी सांगितले.