मोठी बातमी: करुणा मुंडेंच्या कार्यक्रमाला परवानगी नाकारली; दिलं 'हे' कारण

औरंगाबादः काही दिवसांपूर्वी आपल्या नवीन पक्षाची घोषणा करणाऱ्या करुणा धनंजय मुंडे राज्यातील वेगवेगळ्या जिल्ह्यात जाऊन बैठका घेत आहेत. दरम्यान मंगळवारी ( १८ जानेवारी रोजी) औरंगाबादमध्ये सुद्धा करुणा मुंडे यांची बैठक होणार होती. मात्र या कार्यक्रमाला औरंगाबाद ग्रामीण पोलिसांनी परवानगी नाकारली आहे.

करुणा मुंडे ह्या मंगळवारी औरंगाबाद येथील औरंगाबाद-बीड रोडवरील सिद्धेश्वर लॉन्स येथे होणाऱ्या बैठकीला हजर होणार होत्या. त्यासाठी आयोजकांकडून पूर्ण तयारीसुद्धा करण्यात आली होती. मात्र औरंगाबाद ग्रामीण पोलिसांनी बैठक घेण्यास परवानगी नाकारली आहे. पोलिसांनी करोनाचे कारण देत या बैठकीची परवानगी नाकारली आहे. त्यामुळे आता करुणा मुंडे यांना या कार्यक्रमाला हजर राहता येणार नाहीये.

कार्यक्रम पुढे ढकलला...

औरंगाबाद जिल्ह्यात सध्या करोनाची परिस्थिती गंभीर असून त्यामुळे या कार्यक्रमाला परवानगी देता येणार नाही अशी भूमिका पोलिसांनी घेतली. त्यानंतर आयोजकांनी सुद्धा पोलिसांच्या भूमिकेला मान्य करत कार्यक्रम पुढे ढकलला असल्याचे सांगितले आहे. त्यामुळे आता हा कार्यक्रम कधी होणार याबाबत अजून तरी नवीन तारखेची घोषणा करण्यात आलेली नाही.

वाचाः इंदुरीकर महाराजांच्या किर्तनाचा हजारोंची गर्दी; करोनाच्या नियमांना हरताळ

पक्षाची घोषणा...

राष्ट्रवादीचे नेते आणि सामाजिक न्यायमंत्री धनंजय मुंडे यांच्यावरील आरोपांमुळे चर्चेत आलेल्या त्यांच्या पत्नी करुणा मुंडे यांनी काही दिवसांपूर्वी नव्या राजकीय पक्षाची घोषणा केली होती. 'शिवशक्ती सेना' असं त्यांच्या पक्षाचं नाव असणार असल्याचं त्यांनी म्हटल होतं. तर अहमदनगरमध्ये ३० जानेवारीला मोठा मेळावा घेऊन पक्षाच्या कामाची सुरुवात करणार असल्याची माहिती सुध्दा करुणा मुंडे यांनी दिली होती.

वाचाः बाजरीची भाकरी अन् मिरचीचा ठेचा; रावसाहेब दानवेंची तरुण कार्यकर्त्यांसोबत 'डब्बा पार्टी'