म. टा. प्रतिनिधी, औरंगाबाद
सिडको, एन- पाच भागातील स्नॅक्स सेंटर व आम्लेटची गाडी फोडून त्यातील साहित्य लंपास केल्याप्रकरणी दोन संशयियांना सिडको पोलिसांनी जेरबंद केले. त्यांच्याकडून चोरीची रिक्षा व अन्य साहित्य, असा एक लाख ५२ हजार पाचशे रुपयांचा ऐवज हस्तगत केला आहे. सुनील उर्फ शेंड्या नानासाहेब मोहिते (वय २९, रा. एन- सहा, सिडको) आणि गणेश भगवान वळसे (वय २५, रा. सिंहगड कॉलनी) अशी दोघांची नावे आहेत.
जयभवानीनगरातील गणेश सुखदेव राऊत (वय ४२, रा. तिरुपती कॉलनी) यांची एन- पाच मधील धर्मवीर संभाजी शाळेच्या भिंतीजवळ स्नॅक्स सेंटर व अंडा आम्लेटची गाडी (एम एच २० ई टी २४८२) लागते. संशयित आरोपींनी मध्यरात्री दीडच्या सुमारास राऊत यांचे स्नॅक्स सेंटर व आम्लेटची गाडी फोडून त्यातील गॅस सिलिंडर, कॅरेटमधील स्टिलच्या प्लेट चोरून नेल्या. याप्रकरणी राऊत यांच्या तक्रारीवरून सिडको पोलिस ठाण्यात गुन्हा दाखल करण्यात आला. दरम्यान, पहाटे सिडको पोलिसांनी कोम्बिंग ऑपरेशन केले. त्यावेळी शेंड्या आणि गणेश हे रिक्षातून (एम एच २० ई एफ ७०४०) चोरीचे साहित्य घेऊन जात असल्याची माहिती पोलिसांना मिळाली. त्यावरून पोलिस उपनिरीक्षक बाळासाहेब आहेर, जमादार नरसिंग पवार, राजेश बनकर, स्वप्निल रत्नपारखी, लाल खाँ पठाण यांनी दोघांचा शोध घेत सकाळी साडेआठच्या सुमारास ताब्यात घेतले. चौकशीत त्यांनी राऊत यांचे स्नॅक्स सेंटर व आम्लेटची गाडी फोडल्याची कबुली दिली. त्यावरून पोलिसांनी रिक्षा व अडीच हजारांचे साहित्य जप्त केले. अधिक तपास सुरू असल्याचे पोलिसांनी सांगितले.