म. टा. प्रतिनिधी, औरंगाबाद
स्वत:च्या ११ वर्षांच्या मुलीला धमक्या देऊन तिच्याशी अश्लील वर्तन करणाऱ्या ४६ वर्षांच्या पित्याला तीन वर्षे सक्तमजुरी व चार हजार रुपये दंडाची शिक्षा विशेष न्यायाधीश ए. एस. खडसे यांनी ठोठावली. विशेष म्हणजे लैंगिक छळाचा प्रकार दोनदा झाल्यानंतर पीडित मुलीसह तिच्या आईने पोलिस ठाण्यात धाव घेतली आणि प्रकरणात दोघींची साक्ष महत्त्वाची ठरली. घटनेनंतर केवळ आठ महिन्यांत प्रकरणात आरोपीला शिक्षा ठोठावण्यात आली, ही बाबदेखील उल्लेखनीय ठरली आहे.
याप्रकरणी शहरात राहणाऱ्या पीडित मुलीने फिर्याद दिली होती. फिर्यादीनुसार, फिर्यादी ही शिक्षा ठोठावण्यात आलेला तिचा पिता व आईसोबत राहते आणि पिता हा व्यवसाय करतो. घटनेच्या एक महिन्यापूर्वी घरात संबंधित मुलगी एकटीच असताना पित्याने तिच्याशी अश्लील वर्तन केले. त्या प्रकाराबाबत मुलीने तिच्या आईला म्हणजेच आरोपीच्या पत्नीला सांगितले असता, तिने आपल्या पतीला त्याचा जाब विचारला. त्यावर 'चुकून झाले,' असे त्याने सांगितले. त्यानंतर २२ मे २०१९ रोजी रात्री तिघे झोपले असता, पिता मुलीजवळ गेला आणि पुन्हा त्याने तिच्याशी अश्लील वर्तन केले. त्यावेळी मुलीला जाग आली असता, तिने पित्याला झिडकारले, मात्र त्याने तिला मारण्याची धमकी देत तिच्याशी अश्लील वर्तन सुरूच ठेवले. दुसऱ्या दिवशी मुलीने घडला प्रकार आईला सांगितला आणि त्यानंतर दोघींनी छावणी पोलिस ठाणे गाठून तक्रार दिली.
\B... तर सहा महिने आणखी शिक्षा
\Bखटल्यावेळी, सहाय्यक सरकारी वकील बी. आर. लोया यांनी पाच साक्षीदारांचे जबाब नोंदवले. यामध्ये पीडित मुलीसह तिच्या आईची साक्ष महत्त्वाची ठरली. दोन्ही बाजुंच्या युक्तिवादानंतर व साक्ष-पुराव्यांवरून न्यायालयाने पित्याला भारतीय दंड संहितेच्या ३५४ कलमान्वये दीड वर्ष सक्तमजुरी व दोन हजार रुपये दंड व दंड न भरल्यास सहा महिने अतिरिक्त सक्तमजुरी, तर 'पोक्सो' कायद्याच्या कलम आठ अन्वये तीन वर्षे सक्तमजुरी व दोन हजार रुपये दंड व दंड न भरल्यास सहा महिने अतिरिक्त सक्तमजुरीची शिक्षा ठोठावली.