म. टा. प्रतिनिधी, औरंगाबाद
इंडियन पोस्ट पेमेंट बँकेचे (आयपीपीबी) उद्घाटन लांबणीवर पडले आहे. माजी पंतप्रधान अटलबिहारी वाजपेयी यांच्या निधनामुळे केंद्र सरकारने सात दिवसांचा राष्ट्रीय दुखवटा जाहीर केला असल्याने हे उद्घाटन नियोजित दिवशी होणार नाही. पंतप्रधान नरेंद्र मोदी यांच्या हस्ते आज (२१ ऑगस्टला) या बँकेचे उद्घाटन होणार होते. दरम्यान, येत्या १ सप्टेंबर रोजी उद्घाटन सोहळा आयोजित करण्यात आला आहे, अशी माहिती सूत्रांनी दिली.
पोस्ट खाते देशभरात ६५० इंडिया पोस्ट पेमेंट बँक (आयईपीपीबी) सुरू करणार आहे. जिल्ह्यातील शाखा जुना पोस्ट ऑफिस कार्यालय राहणार आहे. त्यासाठी ११०० चौरस फूट जागा देण्यात आली असून फर्निचरसह अद्ययावत बँक उभारणीचे काम चार महिन्यापूर्वीच पूर्ण झाले आहे. देशातील सर्व शाखा एकच वेळी सुरू करण्याचा निर्णय घेण्यात आला असून आता १ सप्टेंबर रोजी उद्घाटन होईल, अशी माहिती सुत्रांनी दिली.
दरम्यान, बँक सुरू होणार असल्याचे निश्चित झाल्याने येथील कर्मचाऱ्यांनाही खास प्रशिक्षण देण्यात आले. या बँकेतून कर्ज वितरण, क्रेडिट कार्ड वितरण वगळता अन्य बँकिंग व्यवहार होणार असून ग्राहकांना घरपोच सुविधाही देण्यात येणार असल्याचे सूत्रांनी सांगितले.
बँकिंग क्षेत्राला खेड्यांपर्यंत नेण्यासाठी नव्याने यंत्रणा उभी करायची गरज नसून तेथील टपाल कार्यालये उपयोगी ठरतील, या उद्देशाने सरकाने इंडिया पोस्ट पेमेंट बँक सुरू करण्याचा निर्णय घेतला आहे. बँकेत १ लाखापर्यंत रक्कम डिपॉझिट करण्याची मर्यादा राहणार आहे, अशी माहिती सूत्रांनी दिली.